Zanin KTP Hun Hman Dan Tur Ni 31 July, 2020 (Zirtawp Zan)

Zanin KTP Hun Hman Dan Tur Ni 30 July, 2020 (Ningani Zan)

Zanin KTP Hun Hman Dan Tur Ni 29 July, 2020 (Nilai Zan)

Zanin KTP Hun Hman Dan Tur Ni 28 July, 2020 (Thawhleh Zan)

Ephesi 2:10

Pu Zoser Muanpua

Br. Leader

“Thil ṭha ti atân Krista Isuaah chuan siama awmin, ama kutchhuak kan ni si a; chu thil ṭha tih chu kan awmna tûrin Pathianin a buatsaih lâwk a ni.”

 THIL THA TI ATANA SIAM : William Barclay-a chuan “Mihringte hi Pathian danah ni mai lovin Pathian thinlung laka sual kan ni a, motor-a naupang chil hlumtu leh naupang nu inrem theihna chu a chil hlumtu pawisa chawi zat emaw, lung ina a tan rei zawng emaw a ni lova, naupang nu in a chil hlumtu a ngaihdam thlapna thinlung a ni zawk”, a ti. Chutiang deuh chuan bawhchhetu mihring Pathian nena inrem lehna chu Pathian khawngaihnaa ngaihdamna thlawn tawp chauhvin a siam thei a ni.

           Chuti a nih chuan Chhandamna chu thiltih nen inzawmna nei miahlo tihna a ang thei awm e. Mahse a ni si lo. Hetah tak mai hian Paula zirtirna KHIRH lai tak a lo lang a, Khawvela thil tha tih engmah hian Pathian nen min suih zawm thei lo va, min chhandam thei lo, mahse thil tha tihna rah chhuaklo kristianna chuan dik zan lohna a nei si, thiltha tih chu Pathian kar nan ni lovin, Pathian hmangaihna chuan dam chhunga a thatna chu hmangaihna veka chhang let turin a changtute chu a thing let thin tihna a ni.

           Khawngaihnaa chhandam an nih hre chiang tute chuan an nun leh an neih zawng zawng Pathian pek let atan a beitham tiin an sit zawk thin, ‘Engkim mai hi ka ta ni se, Pathian pekah a tawk lo’ tiin. Krista Isuaah chuan thil tha ti tura siam, Ama ruala tihnun an ni.

           Phur chang changa thil tha ti tur mai ni lovin, thil tha tih nunah cheng tawp turin Pathianin a buatsaih lawk a ni. ‘Buatsaih lawk”, tih hian ringtu nun chu tlachawpa chan mai ni lovin remruat lawkna fel tak hmanga ruahman a ni tih a tilang chiang.

Zanin KTP Hun Hman Dan Tur Ni 27 July, 2020 (Thawhtan Zan)

Zanin KTP Hun Hman Dan Tur Ni 26 July, 2020 (Pathianni Zan)

Ephesi 2:8,9

 Pu Zoser Muanpuia

Br. Leader

“Rinna avânga khawngaihnaa chhandam in ni si a; nangmahni thawh chhuah a ni lo va, Pathian thilpêk a ni; thiltih avâng a ni lo ve; chuti lo chuan, miin an chhuang dah ang e”

KHAWNGAIHNAA CHHANDAM : Kristaa tihnun, a ruala kaihthawh te chanvo leh hmabak chu chiang zawkin a sawi zui a. Paula hian Chhandamna chungchangah mihringin tih theih a neih loh zia fiah takin tarlan a tum a.

           Chhandamna chu Pathian thilpek liau liau a ni tih sawi fiahna tawngkam pahnih a nei a chungte chu,’nangmahni thawhchhuah a nilo’, tih leh’thil tih avang a ni lo’, tih hi.

           Mihring chhandamna lungphum chu Pathian khawngaihna a nih pumhlumzia leh mihring lam chan chu ‘rinna’ a nih thu a sawi a ni. Chu rinna chu thlarau nun riltamna, chak lohna leh saruakna inhriatna avanga Pathian lam hawina a ni.

           Pathianin a pek nunna leh amah Lalpa ngei chu chang tura mihring dawnthleng chu rinna a ni. Pathian khawngaihnain chhandamna a thawh chhuah chu mihringin rinnaa a lo dawn sawnin thil ti theiin a lo awma, awmzia a nei thin.

           Mahse ‘Nangmahni thawhchhuah a ni lo’, tih hian ‘Chhandamna’ chu mihring tih a ni lo tih a sawi laiin, rinna ngei pawh hi a huam tel a ni. Rinna hi mihring lam chan niin lang mah se, Paula zirtirnaah thiam chantirna hlawh chhuah nana thil tha tih a tling ngai lo va, dan thiltih nen a inkalhzia a tarlang zel.

           Rinna leh khawngaihna erawh chu then hran theih loh inkawp rem tlat angin a sawi. ‘Pathian thilpek a ni’, tih hian Chhandamna leh a kaihhnawih zawng zawng a huap tel vek a ni.

Zanin KTP Hun Hman Dan Tur Ni 25 July, 2020 (Inrinni Zan)

Zanin KTP Hun Hman Dan Tur Ni 24 July, 2020 (Zirtawp Zan)

Ephesi 2: 4-7

Pu Zoser Muanpuia,

Br. Leader 

“nimahsela, Pathian chuan khawngaihna a ngahin, a mi hmangaihna nasa tak avâng khân, kan bawhchhiatnate avânga thi kan nih lai meuh pawhin Krista rualin min tinung ve a (khawngaihnaa chhandam in ni ta e), Krista Isuaah chuan ama rual vêka min kaithovin, vân hmunahte ama hnênah min ṭhuttîr ta a; chutichuan, hun lo la thleng tûrahte chuan Krista Isuaah hian kan chungah ngilneiin, a khawngaihna ngah nasatzia chu a entîr thei ang.” 

          Chang 4-naa, Nimahsela tih atang hian boruak a inthlak ta hlawk a, Paulan a sawi chak lai tak nia lang, Ephesi mite nihna thar a sawi ta a. 

          Sual vanga thi, thinurna faa piang rengte chu sual kai lo, Krista ruala tihnun an nih thu a sawi ta a ni. 

          Khawngaihna tih thu a han uar zual lai hian chang tinah a sawi lang a; hmangaihna, zahngaihna leh ngilneihna nena thawk ho angin a sawi zawm a ni. 

          Krista rual tihnun sawi fiahna ni awm takin,’Khawngaihnaa chhandam in ni’, tih thu kar tla hi a zep a, hei hi uar leh kimchang zawkin a sawi zui bawk a ni. Krista ruala kaihthawhte chuan van hmuna chanvo an neih tur thu tar lan a ni a. 

          Min thuttir tih hian Pa ding lama Isua thutna kianga thu ve niin a tarlang a, chu chu Van hmuna malsawmna chanvo ropui tak a ni. A bak van lam malsawmna a sawi tel bawk.

           Calvin-a chuan Kristan sual leh thihna a hneh avang leh chawisan a nih zarah ringtu chu, ’hremhmun hnuaihnung ber atangin vanramah chawisanin a awm a ni’, a ti. Chutiangin Philippi lehkhathawna Paulan a sawi angin khua leh tui a nihna chu vanram a ni.

Zanin KTP Hun Hman Dan Tur Ni 23 July, 2020 (Ningani Zan)

Zanin KTP Hun Hman Dan Tur Ni 22 July, 2020 (Nilai Zan)

EPHESI 2:3

Pu Zoser Muanpuia,

Branch Leader

“Chûng awih lo fate zîngah chuan keini pawh hmânah chuan tisa leh rilru duh zâwng tiin, kan tisa châknate angin kan awm vek a, mi dangte ang bawkin thinurna faa piang rêng kan nih kha;”

            THINURNA FAA PIANG RENG : Calvin-a chuan he thuchah tak hi sual inthlahchhawn ring lotu Pelagius-a leh a zuitute ngaih dan dik lohzia tar langtu niin a ngai. Anni chuan Adama sualna chu thlah chhawn pianpui ni lovin an tih dan zira an sual anga sual ve te chauh chu suala thi niin an ngai a.

             Calvin-a chuan Augustine-a ngaihdan zuiin, Pathianin sual neilo a dem ngai lova, mahse Adama thlaha piang zawng2 thihna leh thiam loh chantirna thu a puang bawk si a, hei hian mi zawng2 suala piang, thinurna faa piang reng an nihzia a tichiang a ni tiin a ngai.

             Amaherawh chu Krista laka then nimahsela rin lohna hian hriatna thazam, duhthlanna leh thlarau lam hmanrua dangte a nuai bo vek lova, Krista tello nun chu a ngaihtuah leh duhzawng te mahni hmasialna leh sual lam hlir a nih avangin thihna a ni miau a, nung hming pu sia thi reng si a ni.

             Chatuan nunna nei tur chuan mihringin Krista kal tlanga Pathian a zawm a ngai a ni.

Zanin KTP Hun Hman Dan Tur Ni 21 July, 2020 (Thawhleh Zan)

Zanin KTP Hun Hman Dan Tur Ni 20 July, 2020 (Thawhtan Zan)

Ephesi 2:1

Pu Zoser Muanpuia,

Leader

Nangni pawh in bawhchhiat leh in sualte avânga thi in nih lai khân a tinung che u a ni Ephesi 2:1

           SUAL VANGA THI : Chang khatnaa, sual vanga thi tih a tirhkoh paul’n,’Nangni,’ a tih hi, ‘Jentelte,’ te a sawina niin, ‘Keini’, a tih hi”Juda”, te a sawina a ni.

           A tawng bul lamah chuan ‘sual’ tih hi Grik tawng ‘hamartia’ – ‘kap thelh, tum thelh’ tihna a ni a, ‘bawhchhiatna’ tih hi ‘paraptoma’ – ‘kawng dik pensan, thutak tluksan’ tihna a ni.

           Mihring nunin a thlen tum thleng lo, thil tha a hlen tur hlenlo, kawng dik atanga peng, a tih theih tur, nih theih tur, nilo leh tilo te hi sual leh bawhchhia chu an ni. Rukru, hlepru, tualthat, ruih theih ngawl vei, uire leh ualau taka sualte chauh mi sual nia ngaihna hi a lian hle.

           Mahse sualna chuan rilru leh ngaihtuahna sual te, mahni dinhmun theuhva nih tur ang nih loh leh tih tur ang tihloh zawng zawng hi a huap vek a ni.

           Hei hian sual leh bawhchhiatna laka fihlim famkim tumah an awm lohzia a tilang. Mi tin hi ‘ Khawvel dan anga awm, Setana thlarau dan anga awm, awih lo fate chhunga thawk mek thlarauva hruai, tisa chakna leh rilru duh zawnga anga awm thin’, tiin a lo puh ta a ni.

           Sual vanga Pathian laka then hran hi Pathian lamah chuan thi a ni a, Mihringte hi Pathian laka thi vek niin a puang ta a ni.

Zanin KTP Hun Hman Dan Tur Ni 19 July, 2020 (Pathianni Zan)

Zanin KTP Hun Hman Dan Tur Ni 18 July, 2020 (Inrinni Zan)

Țah Hla 3: 22- Pathian Zahngaihna

T. Lalhruaitluanga

BDIV, ATC

 

Tihborala ka awm lo hi Lalpa zahngaihna a lo ni, A lainatnate chu a kang ngai loh avângin. Țah Hla 3: 22

             Zawlnei Jeremia hian a rawngbawl chhung khan a rawngnawlnaah harsatna chi hrang hrang a tawk a. Mite hmuhsitna tawkin, a thu zirtirte an hnawl nasa hle mai a. Chu mai bakah chuan, Jerusalem tluk chhiatte an hmu bawk a. A lungngaiin hrehawm a ti tak zet a ni.

             Nimahsela, chung ang hun harsa leh khirh a nunin a tawn lai leh, a chipuiten an tawrh lai chuan, Zawlnei Jeremia chuan, Pathian lam a han en a. Pathian zahngaihna leh ngilneihna chu a kang ngai lova. Chu chuan a lo chelh reng a ni tih a han hria a. Chumi avang chuan beiseina thar a nei leh a ni.

             Kan nunah hian harsatna tam tak kan paltlang a. Thil hrehawm tak kan tuar a, thil tam tak kan tawk bawk țhin a ni. Chumi lam ringawt kan en chuan, nun hi a hahthlak a, bei a dawng rum rum thin a ni. Nimahsela, Pathian lam kan en chuan, a zahngaihna leh lainatna kang ngai lo chuan, min lo chelh reng a. Min thlahthlam ngai reng reng lo a, tuk tinin a thar kan dawng zel zawk a lo ni.

Zanin KTP Hun Hman Dan Tur Ni 17 July, 2020 (Zirtawp Zan)

Zanin KTP Hun Hman Dan Tur Ni 16 July, 2020 (Ningani Zan)

Joba 19:25 - Min Tlantu chu a nung a ni

Tv. Lalhruaitluanga

BD-IV, ATC

Ka Tlantu chu a nung tih ka hre si a, Nakinah chuan leiah hian a lo la ding ang. Joba 19: 25

            Joba hian nasa takin hrehawmna leh tawrhna tam tak a tuar a. A thil tawrh hi a rapthlak tak zet a ni. Eng vanga tuar nge tih leh, eng vangin nge a chungah tawrhna a thlen tih hi Joba hian eng mah a hrethiam lo a ni.

            Nimahsela, chu chu thil pawimawh ber a ni lo. A pawimawh ber chu Joba hian, a tawrhnaah hian Pathian a hmu a ni. Joba hian, hrehawm a tawrh lai pawhin, Pathian a beiseina chu a chuai ngai lo. Amah tlantu chu a nung tih a hria, chu ngei chu a la hmu dawn tih hi a ring tlat a ni.

             Ringtute hian kan nunah thil tam tak kan tawk a, kan thil tawnte hi kan hre thiam vek lem lo. Nimahsela, a pawimawh ber chu Pathian kan hmuh hi a ni. Eng lai pawhin, kan beiseina hi thi ngai lo sela. Min tlantu chu a nung a, kan tawrhna leh kan hrehawmna zawng zawng hi a hmu vek a ni. He leiah hian chhanna dawng lo mah ila, min tlantu nung kan hmuh hunah chuan, lawmin kan la zai leh dawn a ni.

Zanin KTP Hun Hman Dan Tur Ni 15 July, 2020 (Nilai Zan)

Zanin KTP Hun Hman Dan Tur Ni 14 July, 2020 (Thawhleh Zan)

Phillippi 3: 7- Krista avanga channa

Tv. Lalhruaitluanga

BD-IV, ATC

 Nimahsela, ka tâna hlâwkna tûr apiangte chu, chûng chu Krista avângin chânnaah ka ruat ta a ni. Phillippi 3: 7

             Paula hian a hun hmasa lamah chuan hamțhatna tam tak a dawng a, tihduhdahnate a tuar ngai lova, Rom mi a nih angin, thil țha tam tak a dawng a ni. Niumahsela, Krista a neih chinah chuan a dinhmun chu letling thawk a ni.

             Paula hloh hi tun hmaa a ‘suahsualna’ kha ni lovin ‘țhatna’ a lo neih țhin zawk kha a ni a. Thil țha tam tak a nei a, dan lamah leh sakhuana lamah pawh țhatna a nei a ni. Nimahsela, chu chu thiamchantirtu a ni lo. Chuvang chuan chung zawng zawng chu Krista avang chuan channaah a ngai zawk a ni.

             Mihringte hian kan duh ber ni țhin chu, hausaknate, nawmnate leh hlimnate a ni. Nimahsela, chung chu Krista tel lo chuan awmzia a awm lo a ni. Ringtute tan chuan Krista neih kan lawmna ber leh kan hlawkna ber tur a ni. Krista avangin nunna buah kan hming ziah a ni a, chatuan nunna kan neih phah zawk a ni. Chuvang chuan Krista avanga engkim chan ngam turin i inbuatsaih zel ang u.

Zanin KTP Hun Hman Dan Tur Ni 13 July, 2020 (Thawhtan Zan)

Zanin KTP Hun Hman Dan Tur Ni 12 July, 2020 (Pathianni Zan)

1 Petera 3:15- Rinna Humhim

Tv. Lalhruaitluanga

BD-IV, ATC

 “amaherawhchu, in thinlungah Krista chu Lalah ruat rawh u; nangmahnia awm in beisei chhan zâwt apiang che u chhâng tûrin inpeih sa fo vang che u; nimahsela, thuhnuairawlh tak leh ṭih dêk chungin;” 1 Petera 3:15

           Petera hian Asian ram te zawk hmar lama Kristian awmte hnenah lehkha a thawn a. Ringtute chuan harsatna an tawk a. Chung an harsatna tawhnaah te chuan fuihin, an rinna humhim tur leh ringtu ni awm renga khawsa turin a ngen a ni.

          Khawvel changkang zel leh hmasawn zelah hian, kawng tam takah kan rinna sawiselna leh sawichhiatna a tam sawt hle mai. Krista kan rinna kawngah zawhna tam tak chhan tur a awm a. Khawvel lama mi thiam tak takin kan rinna chungchangah ringtute min choin, chhanna pe turin min phut nasa ta hle mai.

           Hetiang boruakin min chim mek lai hian. Ringtute chu kan rinna leh kan beiseina chu, ring lote leh ringhlel te hnenah a chhanna pe tura kan in rin fo a ngai a ni. Chumi tur chuan Pathian kan pawl tama, kan tawngtai tam a pawimawh hle a ni. Pathian thu chhiar tam ila, țawngtai tam ila, Kristian lehkhabu țha tak takte i chhiar țhin ang u.

Zanin KTP Hun Hman Dan Tur Ni 11 July, 2020 (Inrinni Zan)

Zanin KTP Hun Hman Dan Tur Ni 10 July, 2020 (Zirtawp Zan)

Sam 1:2 - Lalpa dana nun

Tv. Lalhruaitluanga,

BD-IV, ATC

A lâwmna chu Lalpa dânah a ni zâwk a; A dân thu chu a chhûn a zânin a ngaihtuah ṭhîn. Sam 1:2

          Sam 1-naah hian mi țha leh mi suaksualte awm dan kan hmu a. Mi țha chu, Pathian thu awih, Pathian duh dan anga awma, Pathian thu leh dante ngaihtuah reng mi a ni a. Chu mi chuan Pathian malsawmna pawh a dawng a ni. 

          Mi țha lawmna chu a thil neih leh a malsawmna dawnah te a ni lova, Lalpa dana lawmna zawk a ni. Chu mai ni lovin, Lalpa dan chu a chhun a zanin a ngaihtuah zawk a ni. Mi țha chuan, a nun chu Pathian dan nen a inrem em tiin, a ngaihtuah a. A nun dan chu Pathian thu hmangin a chhui let țhin a ni. 

          Keini ringtute hian, kan nun dan hi Pathian thu nen kan en mil țhin em? Pathian thu hi kan duh danin kan nun pui zawk em ni le? Thil eng pawh ti ila, kan nun chu Lalpa dan nen a in mil em tih hi kan intehna tur a ni a. Kan lawmna te, kan hlimnate chu Lalpa dan a ni em tih hi kan inenfiahna tur a ni.

Zanin KTP Hun Hman Dan Tur Ni 09 July, 2020 (Zirtawp Zan)

Zanin KTP Hun Hman Dan Tur Ni 08 July, 2020 (Nilai Zan)

I Korinth 11: 23a- Pathian Hnen ațanga dawn

Tv. Lalhruaitluanga

BD-IV, ATC 

“Ka thu hrilh chhâwn che u kha Pathian hnên ata ka hmuh asin” I Korinth 11: 23a

             Korinth Kohhran chhungah hian buaina neuh neuh a awm a. Lalpa zanriah an chan danah te Kohhran chhungah hian buaina a awm a ni. Chutiang thu anih avang chuan, Paula hian a thu hmuh leh, a thu hrilh chu Pathian hnen ațanga a hmuh a nih thu a hrilh ta a ni.

             Kan tuipui zawng leh mi hnena thu kan sawi țhinte hi Pathian hnen ata kan hmuh a ni em? Kan tuipui zawng leh kan duh dan anih vang ngawtin, Pathian thu a ni e tiin kan sawi mai mai țhin em? Kan thu sawi țhinte hi mi hnen ațanga kan dawn mai mai zawkte a ni lo maw? Mahni in in enfiah țhin ang u.

             Tirhkoh Paula ang hian huai takin, “Ka thu hrilh chhawn che u kha Pathian hnen ata ka hmuh asin” ti ve turin, Pathian thu zir ila. Bible uluk takin chhiar ila, mahni duh dan ni lovin, Pathian duh dan zawkin, a sawi tum hi zir chhuah tum zawk ang u. Kan thu sawi hi Pathian hnen ațanga kan hmuh, thianghlim leh nunpui tlak lo ni mawlh rawh se.

Zanin KTP Hun Hman Dan Tur Ni 07 July, 2020 (Thawhleh Zan)

Zanin KTP Hun Hman Dan Tur Ni 06 July, 2020 (Thawhtan Zan)

Matthaia 5:10- I Ram lo thleng rawh se

Tv. Lalhruaitluanga,

BD-IV, ATC 

Felna avânga tihduhdah tuar hnute chu an êng a thâwl e; vânram an ta a ni si a. Matthaia 5:10 

            Khawvel changkang zelah hian kohhran leh khawtlang țhen hranna a lian telh telh niin a lang a. Chu chuan kan Kristianna leh kan khawtlang nun nasa takin a nghawng a tih theih. Kan Kristianna chuan khawtlang nun a thleng pha lo telh telh a. Biak In chhung leh Kohhran huang chhung bak a pel thei ta meuh lo. 

            Lal Isuan, țawngțai dan min zirtirnaah chuan, 'I ram lo thleng rawh se, vana an tih angin leia mi'n ti rawh se' tih a ni. Pathian ram chu he leiah hian lo thleng sela, vana Pathian duh zawng an tih angin, leiah pawh hian tih lo ni rawh se, tiin țawngțai dan a zirtir a ni. 

            Kan Kristianna chu Kohhran leh Biak In chhungah chauh a ni tur a ni lova, kan nitin hnathawhna leh, khawtlang nuna kan nun hona hmunah kan Kristianna a lang tur a ni. Pathian ram hi nakin hun chauha awm tur a ni lova, he leiah pawh a thleng tur a ni a. A famkimna erawh chu nakin hunah a ni zawk a ni. 

            Kan khawtlangah leh kan ramah Pathian ram a lo thlen a, vana miten an tih ang chu leia miten kan tih ve theih nan, kan nunah Pathian ram a thlen theih nan i inbuatsaih zel ang u.

Chawlhhmun Branch KTP Biak In Sak hnatlang hlimthla 6.7.2020

Zanin KTP Hun Hman Dan Tur Ni 05 July, 2020 (Pathianni Zan)

KTP News 5 July, 2020

Zanin KTP Hun Hman Dan Tur Ni 04 July, 2020 (Inrinni Zan)

Sam 42:1- Pathian châk

Tv. Lalhruaitluanga

BD-IV, ATC

Sakhi, luite tui châka a thaw huam huam ang hian, Aw Pathian, ka nunna hi nangmah châkin a thaw huam huam a ni. Sam 42:1

           Sam ziaktu hian a nunah harsatna nasa tak mai a tawk a. Chung harsatna a tawh avang chuan Pathian a ngai em em mai a. Sakhi lui tui in châk a, thaw huam huam ang mai hian, a nuna chuan Pathian chu a mamawh em em mai a ni.

           Mihringte hian kan nunah hian harsatna nasa tak kan tawk thin a. Manganna leh buaina ten min chim buai nasa em em mai a. Chutiang ang hun kan nunin a tawh chuan kan chau em em a, kan thlarau nun thlengin a nghawng thin a ni.

           Nimahsela, mi tam tak chuan chung hunah chuan kan manganna ata min chhanchhuak tur chauhin Pathian chu kan ngai a, kan châk thin a ni. Kan harsatna, kan tawrhna ata min chhuah tur chauhin Pathian kan châk thin a ni.

           Eng dinhmunah pawh ding ila, eng pawh tawk ila. Kan nun chuan Pathian chauh a châk tur a ni. Chu chu ringtute nun dan tur a ni. Kan harsatna hmunah leh kan manganna hmunah pawh kan nun chuan Pathian chu a châk zawk tur a ni. Eng pawh tawk ila, kan thil tawn chuan Pathian min hnaih tir zel sela, tih hi ringtute kan tawngtaina tur a ni.

Zanin KTP Hun Hman Dan Tur Ni 03 July, 2020 (Zirtawp Zan)

Zanin KTP Hun Hman Dan Tur Ni 02 July, 2020 (Ningani Zan)

Ephesi 6:21- Lalpaa unau duh tak

Tv. Lalhruaitluanga

BD-IV, ATC

 Nimahsela, nangni pawhin engtin nge ka awm, ka chanchin in hriat theih nân, Tukika, Lalpaa unau duh tak leh rawngbâwltu rinawm tak hian engkim a hriattîr ang che u. Ephesi 6:21

          Paula hian lehkha a thawn hian a tawpah thlahna chibai bukna thu a sawi fo thin a. Chungah chuan a rawngbawlpuite chanchin pawh a ziak lang thin a ni. Chung a rawngbawlpuite chanchin a ziah lannaah chuan an chanchin a chhe zawngin a sawi ngai lo hle a ni. 

          Tukika pawh hi a chanchin Bibleah hmuh tur a tam lem lova. Paula rawngbawlpui ani tih erawh kan hmu thei a ni. Ephesi khuaa Paula lehkhathawn kengtu hi a nih a rinawm. Chutiang chu ni mahsela, Paula chuan, Lalpaa unau duh tak tiin a rawngbawlpui chanchin hi a sawi a ni. 

          Keini pawhin Paula hi kan entawn a tha hle awm e. Kan rawngbawpuite chanchin a chhe zawnga sawi vak vak hi ringtute tih dan tur a ni lova, kan duh loh zawng a lo awm hlauh anih pawhin anmahni mimal taka hrilh mai thin hi thil tha a ni zawk ang. Paula ang hian kan rawngbawpuite chanchin a chhe zawnga sawi lovin, Pathian rawng kan bawlpui an nihna zawk hriain, an chanchin a chhe lam zawng sawi lovin, an thatna lam i sawi zel ang u.

Zanin KTP Hun Hman Dan Tur Ni 01 July, 2020 (Nilai Zan)