Zanin KTP Hun Hman Dan Tur Ni 31 May, 2020 (Pathianni Zan)

Marka 3:28-30 - Thlarau Thianghlim Sawichhiat

Tv. Lalhruaitluanga

BD-IV, ATC

            Tihtakmeuhvin ka hrilh a che u, mihring fate hi an sualna zawng zawngah leh Pathian an sawichhiatna kawng engah pawh, an sawichhiatnaahte chuan ngaihdam an ni ang; tu pawh Thlarau Thianghlim meuh sawichhia erawh chuan eng tikah mah ngaihdamna a hmu lo vang a, chatuan sualna kawngah chuan thiam lohvin a awm zâwk ang,” a ti a.  (“Ramhuai bawlhhlawh a zâwl a ni,” an tih avâng khân chu chu a sawi a ni.) Marka 3:28-30

            Jerusalem atanga dan zirtu lo chhuk thlate khan Isua kha an sawi chhe nasa hle mai a. ‘Belzebula a zawl a ni. Ramhuai lal a ni’ tiin nasa takin an sawisel a. Thlarau Thianghlim puihna ni loin ramhuai puihnain a ni ramhuai a hnawhchhuah tiin nasa takin an sel a ni. Chu an sawiselna leh an thu sawi zawng zawng chu Isua chuan a hre vek a. Chung ho chhan let nan chuan he thu hi a sawi ta a ni.

            Jerusalema atanga dan ziakmi lo kalte kha Isua thiam loh chantir saa lo kal an ni a. Isua thil tih zawng zawngte kha ngun taka, thlithlaia, a zirtirnate kha uluk taka ngaithlak tuma lo kal an ni lova. Isua thiam loh chantir tum saa lo kal an ni.

            Dan ziak mite khan Isua an hmu a, a thil tihte pawh hmu reng chung si khan Isua kha an ring duh lova, Isua chu ramhuai lal ti hialin an chhuah a ni. Chu chu Isuan a duh loh em avangin, Thalrau Thianghlim meuh sawi chhia chu ngaihdamna a hmuh loh tur thu a sawi a ta a ni.

            Kan Kohhran Thurin VI-naah chuan Thlarau Thianghlimin kan chunga hna a thawh dan a sawi a. Thalrau Thianghlim chuan keimahniah felna rah chi tinrengin a thawk chhuak thin a, Isua Krista pawm thei turin min pui a ni. Kan nuna Thlarau Thianghlim hnathawh kan lo hnawlna chu Thlarau Thianghlim kan sawi chhiatna chu a ni a. Thlarau Thianghlim chuan kan sualte sim turin min pui a, chu kan sualte sim tura min puitu ber Thalrau Thianghlim kan hnar chuan, Pathian ngaihdamna kan chang dawn lo a ni.

            Chhandamna kan chan theih nan Pathianin a Fapa Isua Krista khawvelah a rawn tir a, Isua chuan Krawsah kan tan chhandamna a rawn thawk zo a, chu Chhandamna chang tur chuan Thlarau Thianghlim chuan min pui a, kan sual zia leh chak loh zia min hriattira, tichuan Thlarau Thianghlim chuan Chhandamna pawm thei turin chakna min pe zawk a ni.

            Pathian Chhandamna ropui tak kan chan theih nan, Pathian hnenah intulut ila, a duh zawng kan tih theih nan Pathian Thlarau chuan min tanpui dawn a ni. Chutiang kan ti lova, Thlarau Thianghlim kan hnawl anih erawh chuan chatuan thlengin ngaihdam kan ni thei dawn lo a ni.

Zanin KTP Hun Hman Dan Tur Ni 30 May, 2020 (Inrinni Zan)

Zanin KTP Hun Hman Dan Tur Ni 29 May, 2020 (Zirtawp Zan)

Johana 13:34, 35 Inhmangaih tawn

Tv. Lalhruaitluanga

BD-IV, ATC

“Thupêk thar ka pêk che u hi, inhmangaih ula; keiin ka hmangaih che u ang hian nangni pawh inhmangaih ula.  In inhmangaih chuan mi zawng zawngin ka zirtîrte in ni tih chumiah chuan an hria ang,” a ti a. Johana 13:34, 35

            Lal Isua rawngbawlna kha kan thlir chuan hmangaihna a khatin rawng a bawl a, midang tan a nun a hlan a, ngaihdamna in a khat a, mi te hriatthiamna leh mahni inphat nun nei in rawng a bawl a ni. Isua hunlai kan thlir chuan Mosia dan ring sakhaw mi tak tak, mahse, midangte hmangaih aia sakhuana dan ngaipawimawh zawk temple rawngbawltu an awm thin a nih kha. Khang mite rawngbawlna kha Isuan Pathian rawngbawlnaah a pawmsak lo mai ni lo in mi derah a chhuah hial a ni.

            Chungte avang chu a ni ang, thupek thar zirtirte a chah pawh Inhmangaih tawn a ni. Inhmangaih taka rawng an bawlna khan Isua zirtirte an ni tih a tilang ang a, miten tute nge an nih an hria ang a, rawngbawlna nung an nei thei dawn a ni.

            Chu thupek thar chu vawiin ni thleng a thupek a la ni reng a ni. Rawng kan bawl a, theih tawpin, thahnemngai takin, hma kan hruai thin pawh a ni maithei. Amaherawhchu, kan rawngbawlnaah midang te thawh that loh lai hre ran emaw, mahni thiltih hre tak emaw a, kan active a nih chuan, Isua hian kan thahnemngaihna kha rimtuiah min pawmsak duh ang em?

            Rawngbawlpuite a ruka haw ru ran emaw pawn lama inlungrual hmel tak, chhunglama induhsakna nei miah lo te in kan lo thawhpui thin em? Mahni inzawt ta ila, chutiang rawngbawlna kan kalpui thin a nih chuan kan rawngbawlna hi a nung thei ngai lo ang. Inhmangaih tawnna tak tak tello chuan rawng kan bawl ho na hian rah tha a chhuah theilo a, KTP fak mawi chawp a ngai a, Kohhran sawimawi chawp a ngaih phah thin.

            Inhmangaih takin, induhsak takin, rawngbawl ila, Lal Isua thupek hnuhnung hre rengin rawng i bawl tlat ang u.

Zanin KTP Hun Hman Dan Tur Ni 28 May, 2020 (Ningani Zan)

Zanin KTP Hun Hman Dan Tur Ni 27 May, 2020 (Nilai Zan)

Matthaia 14:22, 23- Fianrial Tawngtai

Tv. Lalhruaitluanga

BD-IV, ATC

“Tin, mipuite chu a ṭîntîr vêl chhûngin, a kal hmaa râl lehlama lo kal hmasa tûrin zirtîrte chu lawngah a chuan luihtîr ta nghâl a. Tin, mipuite chu a ṭîntîr hnuin, ṭawngtai tûrin tlângah chuan a han kal hrang a; tin, tlai lam a lo nihin chutah chuan amah chauhvin a awm ta a.” Matthaia 14:22, 23

            Kan bible chang tarlan hi Lal Isuan mipui sangnga a hrai zawh hnu chiaha thil thleng a ni a. Johana ziak lama kan hmuhah chuan, Isuan thilmak a han ti kha, mipuite chuan ropui an ti em em a, lala siam an tum ta ut ut mai a. Mahse Isuan chu chu a lo hriatin, mipuite chu a kaldarh tir a, a zirtirte pawh ral leh lama kal tur chuan a kal tir ta zawk a ni. Isua chu tawngtai turin tlangah a kal hrang daih thung a, fianrial hmang turin mipui tam tak lak ata chu a kal hrang zawk a ni.

            Ringtute nunah hian fianriala Pathian pawlin thil tangkai tak leh kan tih ngei ngei tur pawh a ni. Lal Isua pawh kha fianrial tawngtai nei turin a kal fo tih kan hmuin kan hria a ni. Fianriala Pathian pawl thinte nunah Pathian a inpuang thin a ni.

            Ravi Zacharias-a chuan, “Tawngtaina chu Pathian kan biakna leh kan duh zawng kan thlenna ringawt hi a ni lova. Tawngtaina chu Pathian nena lairil taka kan inpawlna zawk hi a ni” a ti a ni.

            Mi tam tak chuan, kan tawngtai hian Pathian hnenah thil kan dil ang a, chu kan thil dil chu kan duh anga rawn tihlawhtling turah kan ngai thin. Chu chu tawngtaina awmzia leh nihphung a ni lo a ni. Tawngtaina chu Pathian nena thinlunga inzawmna leh inpawhna zawk hi a ni, Pathian nena kan inkawmna pawh tih ila a sual awm love.

            Chutiang ang taka, Pathian nena inpawlna tak tak nei thei tur chuan fianriala Pathian nen kan inpawl hi a ngai a ni. Chutianga kan inpawl theihna hun remchang chu tun hun a ni. Kan inkhawm thei lova, kan inkharkhipa, chu hun chu remchangah hmangin Pathian nena inpawlna tak tak nei turin, fianrial tawngtaina neiin Pathian nen in pawl thin ang u.

Pasal Nei thar

         Kan member C. Liansangpuii (Lsi) chuan vawiin khan Lungsir Presbyterian Kohhran Biak inah pasal a nei. Lsi kan lawmpui a, nupa hlim tak ni turin duhsakna kan hlan e..Branch hmingin lawmpuina Citation leh pawisa hlan a ni bawk

Zanin KTP Hun Hman Dan Tur Ni 26 May, 2020 (Thawhleh Zan)

Zanin KTP Hun Hman Dan Tur Ni 25 May, 2020 (Thawhtan Zan)

Ezekiela 36:26-28 - Nun Thar

Tv. Lalhruaitluanga

BD-IV, ATC

Thinlung thar ka pe ang che u a, in chhûngah thlarau thar ka dah ang; in tisa ata thinlung, lung anga sak chu ka la bo vang a, thinlung, tisa anga nêm ka pe zâwk ang che u.  Tin, in chhûngah ka thlarau ka dah ang a, ka dân siamah ka lêntîr ang che u a, ka thupêkte chu in vawng ang a, in zâwm ang. In pute hnêna ram ka pêkah chuan in chêng ang; tin, nangni chu ka mite in ni ang a, kei in Pathian ka ni ang. Ezekiela 36:26-28

            597 AD -538 AD khan Israel mite chu Babulon salah an tang a. Hetia kum 70 vel lai Babulon sala an tan hnuah 539 AD vel khan Syria mi lal Kura hmangin Israel mite chu an saltanna atangin chhuah an lo ni ta a. Chu saltanna atanga an chhuah hnuah chuan Zerubabela te, Ezra leh Nehemiate hmangin Israel hnam leh a ram chu siamthat leh a ni a.

            He siamthatnaah hian kulh bang te bakah an khawtlang nun te siamthain Pathian hnam thianghlim an nihna te pawh chu ngaihpawimawh thar leh a ni a. Ezra kaltlang in Pathian dante pawh in zirtir thar leh a ni bawk a. Mahse chung siamthatna zawng zawng chuan Israel fate thinglung chu a thlak danglam thei chuanglo (Neh. 13). An sual chhunzawm tho a, an saltan hma ang rilru kha an la pu reng tho a ni.

            Thuthlung hlui ah chuan Pathian dan chu an chhiar a an bengin an hria a, mahse an thinlung a an vawn reng loh avangin (mihring thinlung chuan sual lam a duh tlat avangin Gen. 6:5) an bawh chhe leh thin a sual lam zawk chu an chak thin fo avangin Pathian in a thunun fo thin a ni.

            C.S Lewis chuan dan hmangin mi a tih fel theih loh nun dan tha chu a thinglung a tuh a ngai zawk a ni, a ti. (Mere Christianity p. 73) Dan hmanga ti suh ti rawh kan in tih fo hian min siamthain kan hria em?

            Tin, in chhûngah ka thlarau ka dah ang a, ka dân siamah ka lêntîr ang che u a, ka thupêkte chu in vawng ang a, in zâwm ang tia Ezekiela sawi khi a Pathian thil tum zawk chu a ni ngei ang.

            Dan chuan sual chu sual a ni tih min hriattira mahse thinlung thlak thei tu chu Pathian chauh a ni. Dan chu a thalo tihna a nilo, Pathian min hnaih tir tak tak tu atan dan chu a famkimlo mai zawk a ni.

            Mi tupawh Pathian nen inzawmna an neih tawh chuan, chu an mahni a cheng Pathian chuan an duh zawng te a thlak danglam zawk thin a ni. Pawimawh ta em em chu Johana 14:26 a kan hmuh hi “Tin, Thlamuantu, Thlarau Thianghlim, Pain ka hminga a rawn tirh tûr khân, chu mi chuan engkim a zirtîr ang che u a, in hnêna ka sawi zawng zawng a hriat chhuahtîr leh ang che u”

(Chhiarbelh atan Luka 11:1-13)

Ṭawngṭai chungchâng zirtîrna

(Mt 6.9-13; 7.7-11)

¹Tin, heti hi a ni a, Isua khawii hmunah emaw a ṭawngṭai a, a ṭawngṭai zawh chuan a zirtîr pakhatin a hnênah, “Lalpa, ṭawngṭai dân Johanan a zirtîrte a zirtîr ang khân min zirtîr ve ta che,” a ti a. ²Tin, ani chuan an hnênah, “In ṭawngṭai chuan heti hian ti ang che u,

‘Kan Pa,

I hming zahawm rawh se.

I ram lo thleng rawh se.

³Ni tin kan ei khawpin chaw min pe ang che.

⁴Kan sualte min ngaidam ang che,

Keini pawhin kan englo bâte zawng zawng kan ngaidam ṭhîn a ni.

Thlêmnaah min hruai lût suh ang che,’ ”

a ti a.

⁵Tin, amah vêkin an hnênah, “In zîngan tuin emaw ṭhian nei sela, zanlaiah a hnêna kalin, ‘ṭhiana, chhangpêr pathum mi pûktîr rawh; ⁶ka ṭhian zinin mi rawn tlawh a, a hmaa hlui tûr eng mah ka nei si lo,’ ti sela; ⁷in chhûnga miin, ‘Mi tibuai suh; tûnah zawng kawng khâr a ni a, ka fate pawh ka hnênah khumah an mu tawh a; thovin ka va pe thei lo va che,’ tiin chhâng sela; ⁸ka ti a che u, a ṭhian a nih avângin thovin a va pe lo na a, a dîl ngut ngut avângin thovin a duh zât apiang a va pe ang.

⁹“Chutichuan, ka ti a che u, dîl rawh u; tichuan, an pe ang che u; zawng rawh u; tichuan in hmu ang; kik rawh u; tichuan, an hawnsak ang che u. ¹⁰Tu pawh a dîl apiang chuan an hmu ṭhîn a, tu pawh a zawng chuan an hmu ṭhîn a, tu pawh a kik chu an hawnsak dâwn a ni. ¹¹Nangniho zînga pa hi, a fapain chhangpêr dîl sela, tu nge lung pe ang? A nih leh, sangha dîl sela, tu nge sangha aiah rûl pe ang? ¹²A nih leh, artui dîl sela, khawmualkaikuang a pe ang em ni? ¹³Chutichuan, nangni mi sual mahin in fate thil ṭha pêk nachâng in hriat chuan, in Pa vâna mi chuan a dîltute chu Thlarau Thianghlim a va pe dâwn êm!” a ti a.

Zanin KTP Hun Hman Dan Tur Ni 24 May, 2020 (Pathianni Zan)

Zanin KTP Hun Hman Dan Tur Ni 23 May, 2020 (Inrinni Zan)

Isaia 55:8,9- Engkim Chunga Roreltu

Tv. Lalhruaitluanga

BD-IV, ATC

“Ka ngaihtuahte hi i ngaihtuahte a ni si lo va, i awm dânte chu ka awm dân a ni hek lo,” Lalpan a ti.  “Vân khi lei aia a sâng zâwk angin, ka awm dânte hi in awm dânte aiin a sâng zâwk si a, ka ngaihtuahte pawh hi in ngaihtuahte aiin a sâng zâwk bawk a ni. Isaia 55:8,9

          Isaia bu hi mi thiamte chuan hmun thumah an țhen a. Isaia pakhatna (Proto Isaiah 1-39), Isaia pahnihna (Deutero Isaiah 40-55) leh Isaia pathumna (Trito Isaiah 56- 66) tiin an țhen hrang a ni.

          Isaia pahnihna hi Juda sal tang rilru hrehawm taka awm mekte thlamuanna lehkhabu tih theih a ni a. Pathian chu engkim tithei leh engkim chunga roreltu, Pathian dik leh chungnung a nih zia kan hmu a ni.

          Judate kha Babulon salah an tang a. Chu an sal tanna lak ata chhanchhuaktu tur chu an ngai em em thinin a rinawm. Judate chuan Pathian engkim chunga roreltu chu tihtlawmin a awm ta emaw tih chang pawh an ngahin a rinawm. Nimahsela Pathian chuan a mite thinlung chu a hria a, a hmu vek a ni.

          Mihringte chuan kan ngaihtuah phak tawk atangin thil kan thlir a. Pathian hi a fair lo, chuti chuan tih awm a ni a. Eng nga ti nge ti hian a tih kher? Tiin zawhna tam tak kan zawt a, Pathian kan chhuahchhal chang pawh a tam țhin ang.

          Nimahsela, Pathian chu kan chunga roreltu a ni a. Kan ngaihtuah ang lek hian thil a ngaihtuah lova. Pathian atna chu mihring aiin a fing zawk a ni. Pathian chu engkim chunga roreltu a ni a, engkim hi ama siam leh ama thu thua awm a ni.

          Chuvang chuan ringtute, amah zuitutena kan tih tur chu Pathian chu engkim chunga thuneitu a ni tih pawm mai hi a ni. Khawvelah hian Pathian hriatpui lovin engmah a thleng lo. Pathian chu engkim chunga roreltu a ni a. Kan ngaihtuahna ai hian a ni ngaihtuahna chu a sang zawk a. Ani chuan engkim a hria a, engkim a hmu vek a ni. Pathian engkim chunga roreltu hmaah hian intulut țheuh ang u.

Zanin KTP Hun Hman Dan Tur Ni 22 May, 2020 (Zirtawpni Zan)

Zanin KTP Hun Hman Dan Tur Ni 21 May, 2020 (Ningani Zan)

Genesis 3:21- Pathian Khawngaihna

Tv. Lalhruaitluanga

BD-IV, ATC

“Tin, Lalpa Pathian chuan Adama tân leh a nupui tân chuan savun kawrfualte a siamsak a, a haktîr ta a”. Genesis 3:21

            Genesis 3naah hian mihringte suala tluk thu kan hmu a. Pathianin mihringte hnena a thuchah, ei thiang lo a tih chu mihringten an ei avangin mihring chu suala a lo tlu ta a ni. Chuvang chuan mihring chu Pathian lakah mi hrang a lo ni ta a ni.

            Mihring tluknaah hian Pathian hmangaihna leh khawngaihna ropui zia kan hmu a  ni. Pathian chuan mihringte suala an tluk hnu chuan a ngaihthah mai lova, a ensan mai lo, an tan savun kawrfual a la siamsak cheu a ni. Hmanlai Middle Eastern hunah chuan an chunga thiltisualtute chu an kawr an pawhhthler sak thin a. Nimahsela, Pathian chuan thu zawm lova, a thu awi lotu chu mihringte tan an hak tur a la siam sak zawk a ni. Chumai chu a la ni lo, Pathian chuan mihringte chu a kawr siam chu a la haktir zawk a ni.

            Pathian chuan suala tlu mihringte chu a thu kan awih loh avangin min hawisan mai lova, min ensan mai lo. Min ensan a hnekin kan tan kawng min buatsaih sak zawk a, hmangaihna leh khawngaihna kutin min kuangkuah a, kan tan a fapa Isua Krista min pe zawk a ni. Pathian hmangaihna leh khawngaihna dawng turin tunah hian Pathian chu pan mai rawh le.

Zanin KTP Hun Hman Dan Tur Ni 20 May, 2020 (Nilai Zan)

Zanin KTP Hun Hman Dan Tur Ni 19 May, 2020 (Thawhleh Zan)

Kolossa 1:16-18 Mihring siam chhan

Tv. Lalhruaitluanga

BD-IV, ATC

“amahah chuan engkim siam a ni a, vâna awmte, leia awmte nên, hmuh theihte, hmuh theih lohte nên, lalṭhutphahte pawh, rorêlnate pawh, lalnate pawh, thuneihnate pawh; engkim ama siam a ni, ama ta tûr bawka siam a ni;  tin, ani hi chu engkim awm hmain a awm rêng a ni, amahah chuan engkim a ding ho bawk a ni.  Ani chu taksa (chu chu kohhranho) lu a ni a; engkimah chungnung ber a lo nih theih nân, a bulpui, mitthi zîng ata piang hmasa bera chu a ni.” Kolossa 1:16-18

          Eng vanga siam nge kan nih tih kan ngaihtuah ve fo maithei a. Ringtute chuan “Pathian tana siam kan ni” kan tih ngei a rinawm. Thilsiam reng reng hi chhan neia siam an ni a. Kan hmuh theih leh hriatthiam chinah pawh thilsiam thenkhat te awm chhan sawi tur kan nei ngei ang.

          Science lama food chain kan tih te hian kan in mamawh tawn zia te pawh a tilang awm e. Chutiangin thing te chuan mihring te mamawh oxygen min pechhuak a. Tui thianghlim te chu mihring in chaw ai maha a mamawh zawk ni ten an sawi thin.

          Hengte bakah hian, chhan nei nia kan hriat loh te pawh hi han zir chiang ta ila he khawvel ah hian tih tur pawimawh tak an nei ve ngei ang. Awm chhan (siam chhan) neilo chuan hlutna a neilo te pawh kan ti thei awm e. Thil siam thenkhat an awm chhan kan hriat rih loh avang hian an hlutna kan la hrelo mai chauh a ni thei ang.

          Chung thilsiam zawng zawng chu Pathian tan a ni a, mahse thiltih an nei a ni. Mihring siam chhan chu Pathian a ni a, mahse mihring chuan tih tur a nei ve ngei ang. Mika 6:8 ah “Aw mihring, ṭha chu a entîr tawh che a ni; Lalpan a phût che chu eng nge ni? Dik taka tih leh khawngaihna ngainat leh, i Pathian nêna thuhnuairawlh taka lên dun a ni lo vem ni?” Tih kan hmu a, hei hi ringtu ina a tih tur tamtak zinga pawimawh em em a ni awm e. Thuthlung Hlui atang tawhin Pathian hian amah lenpui tur a zawng thin a.

          A mite zinga awm chu Lalpa chak zawng tak leh nuam tih em em a ni. Huho a min pawl harh bakah Lalpa hian mimal a min pawl thar fo hi a duh thin.

Zanin KTP Hun Hman Dan Tur Ni 18 May, 2020 (Thawhtan Zan)

Zanin KTP Hun Hman Dan Tur Ni 17 May, 2020 (Pathianni Zan)

Philippi 2:3,4- Inngaihtlawmna

Tv. Lalhruaitluanga

BD-IV, ATC

“Elrel leh inngaihhlut avânga eng mah ti lovin, mi tinin inngaitlâwm takin mahni aiin mi dang ṭha zâwkah ruat ṭheuh rawh se; mahni ta ta mai en lovin, mi dang ta pawh en ṭheuh zâwk rawh u.” Philippi 2:3,4

          Paula hian Philippi mite chu Krista nun anga inngaihtlawmna nei turin a duh hle mai a. Inpumkhat lohna a awm palhte pawh a hlau hle a ni ang, inngaihtlawmna nei turin a chah lawm lawm mai a ni.

          Bible thu kan han thlan chhuah hi lehlin tharah hian a sawi tum a fiah zawk awm e, "Mahni hmasial takin mi dangte țha zawkah dah rawh u. Mahni țhatna chauh zawng lovin, mi dang țhatna tur pawh zawng rawh u." (CL)

          Mihring nun honaah te, kan rawngbawlnaah te leh kan khawsak honaah te hian kan inpumkhat theih loh fo chhan chu midang țhatna kan zawn loh vangte, mahni hma kan sial vang leh kan inngaihhlut vang hi a ni awm e. Chu kan tlawm lohna leh kan inngaihhlutna chuan midang kan en liam a, midang ngaihsak lohna a hring a, thawh hona a ti chhe țhin a ni.

          Ringtute chu kan zui Isuan entawn tur tha tak mai min hnutchhiah a. Ani chu lei leh van lal ni mahse, a inngaitlawma, thilsiam zingah, kan zingah a rawn cheng ta a ni. Isua chuan inngaitlawm takin rawng a bawl a, a zirtirte a thlan chhuahte pawh mi tlawm te te an ni a. Nimahsela Isua chuan anmahniah chuan țhatna a zawng zawk a ni.

          Kan zui Lal Isua tih dan hi keini tih dan tur pawh a ni. Midang ngaihsak chungin inngaitlawm takin rawngbawl ila. Kan rawngbawlna hian thlei bik nei lo sela, mi tupawh ang khat vekin en ila. Mi dangten min hnaih theih nan inngaitlawm ila, midang țhatna i zawng hram hram țhin ang u.

Zanin KTP Hun Hman Dan Tur Ni 16 May, 2020 (Inrinni Zan)

Zanin KTP Hun Hman Dan Tur Ni 15 May, 2020 (Zirtawp Zan)

Thuhriltu 12:13,14 - Pathian țih

Tv. Lalhruaitluanga

BD-IV, ATC

“Hêng thu zawng zawng khaikhâwmna hi i ngaithla teh ang: Pathian ṭih la, a thupêkte vawng rawh; hei hi mihring zawng zawng tih tûr chu a ni mai. Pathian chuan thiltih zawng zawng chungah ro a la rêl dâwn si a, thil inthup engkim, a chhia emaw, a ṭha emawte pawh, tih hi.” Thuhriltu 12:13,14

          Hebrai hote chuan Thuhriltu hi Finna Lehkhabu an tih zingah an telh a. Finna zirtirtuin mihringte nun atana a thuchah tih theih a ni. Thuhriltu buah hian mihring nun awmzia chhuina chi hrang hrang kan hmu thei a.

          Thuhriltu thlirna ațang chuan engkim mai hi a lo thlawn vek a ni a. Thawhrimna te, chhiar tamna te, nawmchenna te pawh eng mah lo mai ani tih kan hmu a. Chuvangin, mihring tih tur awm chhun chu Pathian țih leh a thu awih chu a ni. Mihring thawhrim rah pawh Pathian kutah kawltir mai tur a ni.

          Thuhriltu thupui ber chu Pathian țih leh a thupek zawm chu mihringte mawhphurhna a ni tih hi a ni. Pathian țihna tel lo chuan nun hian awmzia a nei thei lo va, thil eng mah hian hlutna a nei tak tak lo, engkim hi eng mah lo mai a ni. Chuvangin, Pathian țih aia sang leh țha nun chhan tur a awm loh thu min kawhhmuh a ni.

          He khawvelah hian nasa takin thawkrimin bei țhin mah ila, Pathian țihna kan neih loh chuan awmzia awm chuang lo a ni. Khawvel chen tumin, nasa takin tlan mah ila, nun awmzia tak tak kan pawh pha chuang lo va, beidawnna mai lo chu min hmuaktu an awm lo a ni. Pathian țihna chauh chuan nun awmzia min kawhhmuh a, khawvela kan awm chhan pawh Pathian nena inpawl tur kan nih vang a ni. Pathian țihna nun neih hi ringtutena kan tih tur pawimawh tak a ni.

Zanin KTP Hun Hman Dan Tur Ni 14 May, 2020 (Ningani Zan)

Zanin KTP Hun Hman Dan Tur Ni 13 May, 2020 (Nilaini Zan)

Hebrai 11:15,16- Ram tha lehzual chak

Tv. Lalhruaitluanga,

BD-IV, ATC

“Tin, an chhuahna ram chu lungkham sela chuan hâwnna remchâng an hmu tawh ngei tûr a ni. Nimahsela, tûnah zawng ram ṭha lehzual châk an lo ni a, chu chu vâna mi a ni; chutichuan, Pathianin an Pathian tiha awm chu a zak lo ve; an tân khua lam a lo buatsaihsak tawh si a. “Hebrai 11:15,16

            Ringtute nuna thil pawimawh tak chu Rinna hi a ni. Rinna avanga khawngaihnaa chhandam kan nihna hi Kristian thurin pawimawh tak a ni. Hebrai bung 11ah hian Rinna champion puitute chungchang kan hmu a, chung hote chuan englai pawhin Pathian an ring tlat a, Pathian an rinna chu enngmahin a ti nghing ngai lo a ni.

            Pathianin Abrahama a kha ramtiam lam pan turin a kova, Abrahama chuan Pathian chu ringhlel hauh lovin, Pathianin a kohna lamah chuan a kal mai a ni. Pathian chuan fa pawh la nei lo, upa tawh tak Abrahama hnenah khan a thlahte chu arsi anga tam an la nih tur thu a hrilh a, mihring taka ngaihtuah chuan rin harsa tak a ni ang. Nimahsela Abrahama chuan a ringhlel lova, rinnain ke a pen zel a ni. Ram tiam pana a kalnaah khan thil tam tak a tawk ang a, a kalsan tak ram chu a ngaihtuah chhuak ngei ang, nimahsela, a kotu Pathian chu a ring tlat a, a vuan tlat a, a chhuahsan tak ram chu a lungkham a ni lova, ramtiam zawk chuan a rilru a luah tlat zawk a ni.

            Kan nun kawngah hian harsatna tam tak kan tawk ang a, kan tuar ngei ang. Vanram pana kan kal lai hian chhum dum chhah tak a lo zin changte a awm ang a. Nasa taka neksawrin kan awm ang a, tui fawnten min len ang a, khawvel tuipuiah hian kal harsa tih chang pawh kan nei ngei ang. Pathian thutiam kan hriat chhuah changten kan na ang a, ‘Lalpa ngati nge hetiang hi ka tuar bik?’ tiin zawhna pawh kan zawt thin ang.

            Thutiamtu Pathian chu a awm ta lo em ni tia zawh chang pawh kan nei ang. Khawiah nge Pathian a awm tih chang pawh kan nei ang. Mahse, kan hmaa mihuai kalte khan, hun harsa an lo paltlang tawh a, chu hmunah chuan rinnain an ding nghet a ni tih hi hria ang u. Pathian chuan he khawvelah hian harsatna tawk mah ila, kan Pathian nih a zak lova, kan tan khawvel thar min lo buatsaih sak zawk a ni.

            Pathianina min buatsaih, chung lam ami chu rinnain thlir tlat ila, harstana leh hrehawmna kan tawh chang pawhin kan rinna chu vuan tlat ila. Thutiamtu chu a rinawm a ni tih hria ila, rinnain chunglam chu i thlir reng ang u.

Zanin KTP Hun Hman Dan Tur Ni 12 May, 2020 (Thawhleh Zan)

Zanin KTP Hun Hman Dan Tur Ni 11 May, 2020 (Thawhtan Zan)

Matthaia 7:1-2- Mi dang Sawisel

Tv. Lalhruaitluanga,

BD-IV, ATC

Sawisêl suh u, sawisêla in awm loh nân. 2In sawisêl ang bawkin an sawisêl ang che ua, in tehna ngai bawkin an tehsak leh ang che u. Matthaia 7:1-2

            Mihring kan khawsak hona leh kan nun honaah hian mi sawisel peih tak leh thil sawisel peih takte hi chu an ninawm duhin ngeiawm chang a tam thin viau mai. Chutihrual erawh chuan miin thil an sawisel apianga Bible thu tanchhana 'sawisel suh u' tia tan lo khawhte pawh a awm theih viau awm e.

            Lal Isuan 'sawisel suh u' a tih hian mi dangte sawisel hrim hrim chungchang a sawi lova, thil dik leh dik lo emaw, thil tha leh tha lo emaw thliar hrang tura chik taka ngaihtuah thin turin min fuih zawk a ni. Sawisel (Grk- krinaw) tih hi 'thiamloh chantir' a kawk deuh ber a. Mi dang chhiatna duh vang hrim hrima sawiselte, an chhiatna lai hai lan tum zawnga sawisel te, siam that duh vanga kawng dik inkawhhmuh avanga sawisel lam a kawk lem lo a ni. Chutiang anga, mi chhiatna lai zawng ringawta insawisel chu Lal Isuan a sawi zawk hi niin a lang.

            Mi chhiatna lai zawn reng ringawtte, mi that lohna lai sawi chhuah phette hi ringtute tih tur a ni lo a. An thatna tur kan duh vang a nih a, a siamthatna tur kan hria a, a aia thaa tih dan kan thiam anih chuan kan sawi tur a ni ang. Nimahsela, chutiang ni si lova, an chunga roreltu ni awm hrima lo sawi vak vakte, an tlin lohna lai sawi vak vakte hi ringtute tih tur a ni lo.

            Pathian chu engkim chunga rorela dik taka roreltu a ni a. Chuvang chuan mi thatna kan duh vang ni lem lova, an chhiatna lai sawi chhuat phet tum a, an tlin lohna lai hai lan phet tumte chu Pathianin an chungah ro a la rel dawn a ni. Mi khera, min sawiseltute, kan thatna duh vang ni miah lova min beitute chu Pathianin an chungah ro a la rel dawn a ni.

Zanin KTP Hun Hman Dan Tur Ni 10 May, 2020 (Pathianni Zan)

Zanin KTP Hun Hman Dan Tur Ni 9 May, 2020 (Inrinni Zan)

Rom 12:1-2 Danglam Nun

Tv. Lalhruaitluanga,

BD-IV, ATC

Chutichuan, unaute u, Pathian khawngaihna avâng hian, inthawina nung leh, thianghlim leh, Pathian lawm tlâk ni tûrin, in taksa chu inhlânah ka ngên a che u; chu chu in rawngbâwlna âwm rêng a ni.  He khawvêl dân ang hian awm suh ula; Pathian duh zâwng, a ṭha leh, lawm tlâk leh, ṭhat famkim chu in hriat fiah theih nân, in rilru a thara awmin lo danglam zâwk tawh rawh u. Rom 12:1-2   

            Greek hote chuan taksa leh thlarau hi an then hrang a, taksa chu thil tha lo leh sualah an ngai a, chu kan taksaah chuan kan thlarau hi a tang mai chauh niah an ngai a ni. Nimahsela, kan thlarau chu Pathian ta anih ang bawkin, kan taksa pawh chu Pathian ta a ni. Kan taksa chu Pathian ta anih vangin Paula chuan ringtute chu he khawvel dang ni lovin, Pathian hnena inhhlana, kan rilru ti thar a, danglam turin min ti a ni.

            Mihringte chu suala tlu tawh, thatna reng nei lo kan ni a, nimahsela Pathian chuan a khawngaihna avangin min chhandam a ni. Chu min chhandamna avang chuan, Pathian hnena inhlan tur kan ni. Chu chu ringtutena kan tih ngei ngei tur a ni.

            Chuti chuan kan rilru a tharin a lo danglam zawk dawn a ni. Pathian kan biakna tak tak chu a tana kan inhlannaah hian a ni. He khawvel dang anga kan awm chuan, Pathian duh dan angin rilru thar kan pu thei dawn lo a ni. Pathian duhzawnga kan ihlanna chuan rilru thar min pe ang a, nun danglam  min neih tir dawn a ni.

            Greek tawngah chuan ‘thar (new)’ sawi nan hian neos(hun thar) leh kainos(nun thar) an hmang thin a. Paula hian he laiah hian kainos nun thar zawk hi a hmang a ni. Pathian hnena kan inhlanna chuan he khawvel dan lak atangin min la hrang a, rilru thar leh thinlung thar min pe a, nun danglam min neih tir thin a ni.

            Ringtute chu khawngaihna avangin Pathianin min chhandama, min chhandam avang chuan thil tha tiin Pathian hnenah kan inhlan tur a ni. Chu kan inhlanna chuan Pathian khawngaihna avangin nun danglam kan lo neih phah a ni. Nun thar, nun danglam kan neih theih nan, Pathian hnenah inhlan ang u.

Zanin KTP Hun Hman Dan Tur Ni 8 May, 2020 (Zirtawp Zan)

Zanin KTP Hun Hman Dan Tur Ni 7 May, 2020 (Ninga Zan)

Luka 1: 15-16- Lalpa Ngaiha Mi lian

Tv. Lalhruaitluanga

BD-IV, ATC

Lalpa ngaihin mi lian a ni ang a, uain leh zu rêng reng a in lo vang; a nu pum chhûng aṭang rêngin Thlarau Thianghlimin a lo khat ang. Israela thlahte tam tak Lalpa an Pathian hnên lamah a hawitîr leh ang. Luka 1: 15-16

            Isuan Baptistu Johana kha hmeichhe hrin zinga ropui ber tiin a sawi a ni kha. Baptistu Johana hi Mari laizawnnu Elizabeth-i fapa a ni a. Isua kawng sialtu tura Pathian ruat a ni tih bible-ah kan hmu a ni.

            Luka hian Baptistu Johana pian tur thu hi a ziak a, chutah chuan Johana chu Lalpa ngaiha mi lian a nih tur thu a sawi a ni. Lalpa ngaiha mi lian a nih thu a sawi zawh chiaha a chhunzawmna chu- nu pum chhung a\ang rengin Thlarau Thianghlimin a khat ang, zu reng reng a in lovang tih leh Israela thlahte tam tak Lalpa an Pathian hnen lamah a hawitir leh ang tih a ni. Baptistu Johana pian tur thu a\anga kan hmu theih chu Lalpa ngaihah mi lian nihna tur chu Thlarau Thianghlima khahte, zu in ngai loh leh mite Lalpa hnena hruai tih hi a ni awm e.

            Thalrau Thianghlim tel lo chuan ke pen a harsa em em a, Pathian kan hnaih thei lo a ni. Pathian kan hnaih theihna te, sual nih kan inhriatna leh sim tura min puitu chu Thalrau Thianghlim hi a ni. Zu reng reng a in ngai lovang tih hi Thuthlung hlui lama Nazarit mite awm dan kan hmuh kha a ni a. Chung hote chu Pathian tana inserh hrangte awm dan a ni. Pathian tan inserh nunah chuan zu hian hmun a chang lo a ni ang e. Ringtutena kan tih tur pawimawh tak pakhat chu, thlarau bo te, hnungtawlh tawhte Pathian hnena hruai hi a ni. Mi tam tak Pathian ngaihsak lo leh hre lo an awm, chungte chu Pathian ke bulah kan hruai tur a ni.

            Khawvel ngaih a mi lian nih te, mi lakah mi lian nihte chu kan chakin kan duh vek awm e. Chutiang anga miten min ngaih ropui theih nan chuan kan theihtawp pawh kan chhuah \hin. Nimahsela, he khawvel ropuina chuan chatuan a daih dawn lova a ral leh mai dawn a ni. Chuvang chuan Pathian ngaihah mi lian nih hi kan thlang zawk tur a ni. Pathian ngaiha mi lian kan nih theih nan, Amah chu bel ila, tawngtaiin a thute chhiarin Amah nen in pawl \hin ila, he khawvel thil \ha lo leh sual lakah inhthair filhlim ila, midangte Pathian ke bulah i hruai zel ang u.

Zanin KTP Hun Hman Dan Tur Ni 6 May, 2020 (Nilai Zan)

Zanin KTP Hun Hman Dan Tur Ni 5 May, 2020 (Thawleh Zan)

Genesis 11:4 - Babel in sang sak thu

Tv. Lalhruaitluanga

BD-IV, ATC

Tin, “Hawh u, khawpui siam ila, in sâng a chhîpina vân tawng tûrin sa bawk ila, kan hming i tithang ang u; chuti lo chuan, lei chung zawng zawngah hian tihdarhin kan awm dah ang e,” an ti a. Genesis 11:4

            Genesis buah hian Babel in sang sak avanga \awng tihhran thu kan hmu a. Leia mite chuan khawpui siam a, in sang tak, a chhip ina van tawng hial sak chu an tum ta a. Leia chunga mihringte kha an finna a lo sang zel a, a huhova khawpui awm duhna leh in sang sak duhna a lo piang a. Tichuan in sang sak tum chuan hma an la ta a, nasa takin an thawk ta mup mup mai a ni. Chu an thil tih chu Pathianin a lo hriat chuan, \ha a ti lova, an hnawthawk ti buai turin an \awng a tih hran sak ta a. Tichuan leia mite chuan an hna an chhunzawm thei ta lova, hmun hrang hrangah an kal darh tak thu kan hmu a ni.

            Eng ang takin nge \awng tihhran hi a lo awm tak kan hre mai thei lo. A chhan erawh chu hmun hrang hranga mihring awm tura a tihten hmun khata awm khawm tlat an tum avangin an \awng tihhran sak niin a lang a ni. Babel in sang tak hian mihring sualna leh chapona, Pathian tluk tumna leh Pathian laka inlak hran duh hialna chuan minhringte zingah \awng hrang hrang a rawn thlen ta a ni.

            Pathianin mihring a siam chhan pakhat chu khawvel luahkhata amah chawimawi a ni. Nimahsela, chu chu mihring suala tlu chuan a hawisan a, Pathian duh loh zawng tiin, chapona an lo nei ta a ni. Tin, Pathian chuan amah zuitu ringtute chu inngaitlawm taka a rawng bawl turin min duh a. Nimahsela, mihringte chuan ropui nih kan chak a, chaponain kan khat \hin a ni. Pathian chu lei chung zawng zawnga thuneitu a ni a, mihringten min siam chhan ni lo, ramri pela mahni inchawimawi kan tum apiangin, Pathian chu kan nunah a in rawlh \hin a ni. Pathianina min siam chhan nun kan neih theih nan A hnenah inhlan zel ang u.

Zanin KTP Hun Hman Dan Tur Ni 4 May, 2020 (Thawhtan Zan)

Zanin KTP Hun Hman Dan Tur Ni 3 May, 2020 (Pathianni Zan)

Daniela 3:16-18- Min chhanchhuak dawn lo mahse

Tv. Lalhruaitluanga

BD-IV, ATC

          Sadraka te, Mesaka te, Abednegoa te chuan lal chu an chhâng a, a hnênah, “Aw Nebukadnezzar, he thu-ah hian kan chhân che pawh a ngai lo ve.  Kan Pathian, a rawng kan bâwl ṭhina chuan rawh tuina meipui ata min chhanchhuak thei si a, i kut ata pawh, aw lalber, min chhanchhuak mai ang. 18Chuti lo pawh ni sela, aw lalber, i pathiante rawng chu kan bâwl dâwn lo va, i rangkachak milim din pawh chu chibai kan bûk hek lo vang tih hi hria ang che,” an ti a. Daniela 3:16-18

          Pathian rawngbawltu leh Pathian ringtu ropui-Sadraka te, Mesakate, Abednegoa te khan an rin Pathian an va hrechiang tak em. Babulon Lal ropui tak Nebukadnezzara khan rangkachak milim a siam rup mai a. Chu a rangkachak milim siam chu hlanna hun a hmang dawn a, chuta tel tur chuan a ram then hrang hranga mi pawimawhte, hotu deuhte tel turin a sawm a. A milim hlan niah chuan a mi sawmte chu an rawn tel tha khawp mai. Chu rangkachak milim chibai buk tur chuan thupek chhuah a ni a. Chibai buk duh lo chu rawh tuina meipuia paih luh tura tih an ni bawk.

          Tichuan, mi tam tak chuan rangkachak milim chu chibai an buk ta a. Nimahsela, chibai buk ve duh lo an awm tlat mai. Tlangval huaisen pathum, Sadraka, Mesaka leh Abednagoa te chuan chibai an buk duh tlat lo. Chu chu lalin a hriat chuan a ko a. Chibai an buk duh loh avang chuan rawhtuina meipuia paih tura tih an ni. Chung ang hun khirhah pawh chuan an ni pathum chuan, kan chungah engpawh thleng se, i rangkachak milim hi chibai kan buk dawn lo tiin huai takin lal hmaah an ding a ni.

          Kan nunah hian harsatna kan tawk thin a, lungngaihna leh manganna nasa tak kan tawk thin a ni. Chutiang anga kan nunin harsatna a tawh lai chuan kan tawngtaia, theihtawp chhuahin Pathian kan au thin. Nimahsela Pathian chu a ngawi tlat niin kan hria a, Pathian chuan min ensan niin kan ngai hial thin. Chuvang chuan "Khawiah nge Pathian a awm?" Tiin zawhna kan zawt a. Pathian hian min ensan aniang, min hmangaih lo aniang kan ti a. Pathian lakah te kan hel mai thin a ni.

          Mahse, Sadrakate thianzaho kha chuanin heng hremna atang hian Pathian hian min chhanchhuak dawn lo mahse i milim rangkachak hi chibai kan buk lovang an ti tlat mai. Kan nunin harsatna a tawh changin Pathian kan ringhlel a, kan peng bo mai thin. Heng natna kan tawhte, lungngaihna leh manganna kan tawh zawng zawng lak atang hian Pathian hian min chhanchhuak dawn lo mahsela, rinawm taka Pathian rawng kan bawl a, a hnung zui tlat hi kan tih tur a ni. Kan nunah engpawh lo thleng sela, engpawh hmachhawn ila, Lalpa ka zui ang che tiin Pathian i ring tlat ang u. Kan nunin harsatna a tawhte hi kan rinna fiahna ani tiin lawm takin Lalpa i zui zel ang u.

Zanin KTP Hun Hman Dan Tur Ni 2 May, 2020 (Inrinni Zan)

Zanin KTP Hun Hman Dan Tur Ni 1 May, 2020 (Zirtawp Zan)

Matthaia 5: 13- Lei chi in ni e

Tv. Lalhruaitluanga

BD-IV, ATC

“Lei chi in ni e; nimahsela, chi hi a dâk tawh chuan engin nge an tihal leh ang? Chuta chinah chuan paih chhuaha, mihringte rah mai mai chauhvah lo chuan, eng atân mah a tlâktlai lo.” Mathaia 5:13

          Lal Isua khan amah zuitute leh a zirtirte kha thu tha tak tak a zirtir thin a, nun dan tur tha leh thil ropui tak tak a zirtir thin a ni. A zirtirte kha khawvel ngaihah chuan mi ropui tak tak an ni lova, vantlang chunga leng tumah an awm lem lo a ni. Mahse, chung mi ropui lo tak takte chu Lal Isua chuan a zirtirte chu harsat leh hrehawmna karah pawh a thu hretu rinawm ni turin a duh a ni, chutiang atan chuan a ko bawk a ni.

          Chutiang anga thu hretu rinawm ni tura a koh avang chuan, a hunlaia mitena an hman tangkai em em ‘chi’ nen a tehkhin a ni. Rom ho chuan chi hi thil thianghlim ber ber pahnih, ni leh tuifinriat atanga lo insiam anih vangin thil thianghlim ber niin an sawi thin a. Tin, hmanlai hunah chuan chi hi thil vawn that nan leh thil tihtuina atan an hmang thin bawk a, chubakah chuan Thuthlung Hlui hunah chuan chi hi inthawina leh Pathian thuthlung chhinchiahna atan an hmang bawk thin a ni.

          Lal Isua chuan amah ringtute chu he khawvelah hian tihthianghlimtu ni turte, nun dan tha vawng tha tu ni turte leh khawvel sual ti tha turin min duh a, chutiang ni tur chuan min zirtir bawk a ni.

          Chi chu khawi hmunah pawh a al ang hian, ringtute chu kan awmna hmun apiangah Krista thu hretu rinawm kan ni tur a ni a, kan nitin hnathawhna hmunah leh kan khawsaknaah hian ringtu/ Isua zuitu kan ni tih hi miten an hmuin an hre tur a ni. Chu chu Lal Isua duhdan a ni a. Isua hnungzui leh a duhdan zawm chu ringtu zawng zawngte tih tur a ni.