Wednesday, November 17, 2010

Upa Vanhnuna chuan chatuanram min lo pasan ta....


(1918 - 2010)
Vuina Programme
Vui hun : Dt. 18th November, 2010 (Ningani) Dar 12:00 Noon
Vuitu : Pastor B. Vanlalduha
Thusawi : Upa H. Lalnunmawia (Chhungkaw aiawh)
Thlanmual : Upa V.L Dawngliana

Upa Vanhnuna chanchin tlangpui : Upa Vanhnuna hi kum 1918 (Jan/Feb) khan Pu Saithangpuia leh Pi Chawngi te inkarah a lo piang a, pianpui unau mipa pahnih leh hmeichhia pakhat neiin heng a unau te hian chatuan ram an pan san vek tawh a ni. An unau in dawt dan chu :-
  1. Upa Vanhnuna
  2. Challianngenga
  3. Thangi
  4. Vankhuma(Pabuanga)
A nupui Zatuaki nen fa pali an nei a, chung te chu :-  1. Pi Lalrinsiami, 2. H. Lalmuana, 3. Sangliana, 4. Tlangkhuma (a nausen laiin a thi). Tu leh fa hi 39 neiin Khup thum(3) a hmu a ni.
Khawtlang lam : A pain a boral san lai hian kum 16 a ni a, a pa aiawhin Lal Upa atan hman nghal a ni a, Lal hnungzuitu ber a ni nghal a ni. District Council a lo din a V/C thlan hmasak ber anih khan Luangpawl V/C atan thlan tlin a ni a. Luangpawl leh Mamit sawikhawm anih khan V/C anih chhunzawm zel a, kum 1983 thleng khan V/C hna hi a chelh chhunzawm zel a ni. V/C ah pawh hian nihna hrang hrang a chelh kim vek a ni. Luangpawl khuaah Y.M.A din tirh a nihin O.B hmasaber te zingah a tel a; Y.M.A din hi an Lal in a hrethiam lova, Lal hmaisa tawng tu ber a ni nghe nghe. Kum 1983 khan Mamit atangin Vaivakawnah pemin, kum 1986 ah Chawlhhmun hian an rawn pem a, Chawlhhmun-ah hian M.U.P ah hruaitu hmasa te zingah a telve bawk a ni. Hruaitu dinhmun chelh lo mahse phak tawka hruaitute fin chhuaha tawiawmtu, member rinawm tak a ni reng thin a ni.
Kohhran lam : Kum 1954-ah Luangpawl Kohhran Upa atan Khawthlang Presbytery-in Lallen khuaah a nemnghet a. Luangpawl khua Mamit-ah sawikhawm a nih a, Luangpawl khaw lama mi tam tak an kir leh laiin an kir ve ta lova, Mamit Hmunsam Kohhran din alo nihin Upa atan hman chhunzawm a lo ni ta a ni. Kohhran ah hian chanvo pawimawh hrang hrang a chelh bawk a ni.
A mizia : Kohhran thil tih reng reng te hi a ngai pawimawh em em a, inkhawm leh inkhawmpui te phei hi chu a dam phawt chuan a thulh ngai lo a ni. Diary hi a ziak taima em em bawk a, a chetsual hma (1.8.2010) thleng khan a ziak a ni. An awmna khaw hlui lam ami te chuan a dairy hi an tangkaipui hle a, mi pianni thlenga a lo chhinchhiah thin avangin an rawn nasa ve hle thin a ni. A boral dawn thleng hian a mit leh beng hi a tha hle a ni. Lehkhabu hi a chhiar taima em em a, a hmuh phak ang tawk hi chu a hmaih ngai lo. Mizopa rilrua tlawmngaihna neitu leh fate hmangaih em em mi, inthlahrung tak niin midangin an neihna tur a nih chuan mahni ta tur pawh chan vek huam mi a ni. Tin, tawngtai leh Bible chhiar hi a ngainain a ngaipawimawh em em bawk. Zirna lamah hian School hi chawhma chauh a kal a, ziak leh chhiar hi Sunday School ah a zir a, a kutziak hi a mawi em avangin notice board a tar tur atan an hmang ber a ni. Zirna lamah sang lo mah se then leh rual kawm thiam tak, upa leh naupang zawkte pawhin tlangnel taka an kawm theih a ni.
A hun hnuhnung : August ni 1.2010 (Pathianni) zing kara a inthiar tur bathroom-a a kal chu chesualin a khel ruh a ti tliak a, damdawiin kal pui nghal niin rei an awm lova, Doctor ten zai chi a an ngaih loh avangin Thawhlehni-ah in lamah hawpui leh a ni a, in lamah theihtawpin a chhung ten an enkawl a ni. A tu leh fa leh a mo ten duat taka an enkawl laiin nizan (17.11.2010) zanriah tlem a ei hnua a chauh deuh avangin Nurse te koh an ni a, oxygen pawh lak tuma an thang mek laiin dar 8:30 pm khan rinawm taka rawng a bawl thin Lalpa hnenah thlamuang takin min chawlh san ta a ni.

No comments: