Zanin KTP Hun Hman Dan Tur Ni 30 April, 2020 (Ningani Zan)

Zanin KTP Hun Hman Dan Tur Ni 29 April, 2020 (Nilai Zan)

Habakuk 3: 17-18- Lalpaa lawm

Tv. Lalhruaitluanga

BD-IV, ATC

“Theipui thing pâr vul dâwn lovin, Grêp hrui rah dâwn hek suh sêng; Olive thing pawh rah lovin, Lovin ei tûr chhuah dâwn lo sêng; Huang ata ran rual tibovin, Ran inah ran awm lo mah sêng; Ka lâwm zêl ang, Lalpa-ah chuan, Ka chhandamna Pathianah chuan ka lâwm cheu dâwn.”

Habakuk 3: 17-18

            Zawlnei Habakuka hunlai hian an ram ei leh bar (economy)-a pawimawh em emte chu- theipui, grape, olive leh lova an thlai thar bakah, an ran vulhte an ni a. Theipui thing ringawt kha awm ta lose, an ei leh bar zawnna kawngah buaina a thlen vak lovang, chutiang bawkin grape chauh emaw, olive chauh emaw te kha awm ta lose, ei leh bar a nghawng vak dawn lo a ni.

            Nimahsela, a vaia a awm loh vek chuan an tam ngei ang a, an ram ei leh bar (economy) a nghawng ang a, an tuar ngei ngei dawn a ni. Engmah ei leh in tur an nei lo ang a, ei bar zawnna kawngah harsatna namen lo an tawk ngei dawn a ni. Chuti chung chuan Zawlnei chuan, “Lalpa chungah ka lawm cheu dawn a ni,” a la ti thei tlat mai. Nun ropui tak a va ni em.

            Zawlnei Habakuka tawngtaina atang hian ringtuten zir tur kan van ngah tak em. Ani chuan a neih zawng zawng pawh chanin, nei dawn lo mahse, Pathian chunga a lawm zel tur thu a la sawi the tlat mai. Chuti chung pawha lawm thei chuan Pathian a ring hle ang tih a rinawm, Pathian chu engkim chunga roreltu leh engkim neitu a ni tih a hrechiang hle a ni tih a hriat theih.

            Kan nunah hian harsatna tam tak kan tawk thin a, engmah nei lo nia kan inhriat laite a awm thin. Lawmna tur reng hi a awm lova, hawi velna apiang hi kan tan tahna tur ni maite hian kan hre thinin a rinawm. Chutiang ang hun kan nuna a lo thlen chang chuan, “Lalpa, ka lawm e,” tih chu thil har tak a ni.

            Zawlnei Habakuka chuan, a neih zawng zawng pawh chanin, ral vek mahse, ral ve lo tur chu Pathian a ni tih a hriatchian em avangin, “Lalpa chungah ka lawm cheu dawn a ni,” a ti thei zawk a ni. Khawvel hi ral mahsela, kan neih zawng zawng pawh ral mahsela, ral ve ngai lo tur, kan chhandamna Pathian chu a ral ve dawn lova, nun tha leh ropui min pe leh ngei dawn a ni. Khawvel ropuina leh mawinate chuan chuai hun a nei a, kawhvel ram ropui leh thiltithei tak takte pawh an kumhlun ngai lo. Kan Pathian erawh chu a kumhlun a, chatuan thlengin a awm a ni. Chu chu hre rengin, kan nunah engpawh thleng sela, “Lalpa, heng thil avang hian ka lawm e,” tiin i lawm zel ang u.

Zanin KTP Hun Hman Dan Tur Ni 28 April, 2020 (Thawhlehni Zan)

Zanin KTP Hun Hman Dan Tur Ni 27 April, 2020 (Thawhtanni Zan)

Matthaia 6: 33-34- A ram leh a felna zawn hmasak

Tv. Lalhruaitluanga

BD-IV, ATC

 “A ram leh a felna chu zawng hmasa zâwk rawh u; tichuan, chûng zawng zawng chu a pêk belhchhah dâwn che u nia. Chutichuan, a tûk atân lungkham suh u, a tûk chuan ama tân a lungkham chawp dâwn si a. Ni khat atân ni khat hrehawm chu a tâwk a ni.” Matthaia 6:33-34

          Lal Isua tlang chunga a thusawiah hian nun dan tur pawimawh tak tak a sawi a. A thu ngaithlatute hnenah khan zirtirna tha tak tak leh pawimawh tak tak a pe a ni.

          Mihring kan khawsakna atana kan nitin mamawh thil pawimawh zualte chu, ei leh in, silh leh fen leh chenna inte hi a ni awm e. Heng neih tum hian mi tupawh mai hi kan hmanhlel thin a, neih dan kawng kan zawng thin a ni. Palestina ramah khan heng nitin mamawhte hi mi retheite tan ban phak loh chang a awm thinin a rinawm.

          Zirtirte khan engkim kalsanin Lal Isua kha an zui a, chuvang chuan lungkham an ngah hlein a rinawm. Chutiang anih mek lai chuan Isua chuan khawvel thil lungkham lova, Pathian ram leh Pathian duh zawng ngaihtuah hmasa turin a zirtir a, zawng chhunzawm zel turin a ti a ni.

          Ringtute hi kan nitin mamawh tlakchham kan hlauhna hian Pathian min hlat tir fo thin a, a rawngbawlte pawh a ti har fo thin a ni. Kan nitin mamawh thawk chhuak turin kan hmahlel thin a, kan buai a, Pathian ram thu reng reng pawh kan ngaihtuah hman lo fo thin a ni. Pathiana rinna nghah aiin thildangah kan nghat a, kan nitin mamawh neih chu kan damchhan ber emaw kan ti thin a, neih tam lehzual tumin kan hmanhlel thin a, chu chuan Pathian min hlat tir thin a ni.

          Lal Isua chuan, chung zawng zawng ai chuan Pathian ram leh Pathian duh dan chu ngaipawimawh hmasa ula, tichuan, in nitin mamawh chu ka pe ang che u min ti thung a ni. Miin Pathianah rinna a nghah tak tak chuan, Pathianin a mamawh chu a pe dawn a ni tih hi Lal Isua zirtirna a ni. Miin, Pathian ram leh Pathian duh dan a ngaihpawimawh tawh chuan he khawvela a mamawh ber Isua a nei a, Isua chu kan mamawh ber a nih avangin, thil dang chu engmah lo mai a lo ni zawk thin a ni.

          Lal Isua ber kan neih tawh chuan khawvel lungkhamna ten kan nun a tibuai phak tawh lova, rethei leh hausaa awm dan chu Isuan min zirtir tawh zawk a lo ni. Eng dinhmunah pawh ding ila, Pathian ram leh a felna kan zawn chhung chuan hmangaihna leh induhsaknain kan nunah ro a rel ang a, nun hausa kan nei ang a, chu nun chuan midang ngaihpawimawhna nun min pe ang a, kan intanpui tawn ang a, kan indawm kang tawn zawk dawn a ni. Pathian hian kan nuna pawimawh ber nih hi a duh ber a ni. Kan nunah hian thil dang zawng aiin Pathian i thlang ber zawk ang u.

Zanin KTP Hun Hman Dan Tur Ni 26 April, 2020 (Pathianni Zan)

Zanin KTP Hun Hman Dan Tur Ni 25 April, 2020 (Inrinni Zan)

Johana 6: 66-68- Chatuan Nunna Thu

Tv. Lalhruaitluanga

BD-IV

ATC

          “Chu veleh a zirtîrte zînga tam tak an kal bo va, amah an pâwl leh ta lo va.  Chutichuan, Isuan sâwm leh pahnihte hnênah chuan, “Nangni pawhin kal bo in duh ve em?” a ti a.  Tin, Simon Peteran a hnênah, “Lalpa, tu hnênah nge kan kal ang? Nangin chatuana nunna thu i nei alâwm” Johana 6:66-68

          Lal Isua zirtirna kha mi tam takin an man pha lova. Ka tisa in eia in in bawk loh chuan nunna in nei lo a tih pawh kha mi tam takin pawm har an ti em em a ni. Chumi avang chuan a thu ngaithla thin te, amah ngaisanga lo zui ve thinte chuan pawm har an ti em em a ni.

          Lal Isua zirtirna pawm har an tih em avang chuan amah zui tam tak chu an kal bova, Isua an pawl leh tawh ngai lo a ni. Chu veleh Isua chuan a zirtir sawm leh pahnihte chu, “Nangni pawhin kal bo in duh ve em?” tiin a zawt ta a ni. Nimahsela, Petera chuna, “Lalpa, tu hnenah nge kan kal ang? Nangin chatuana nunna thu i nei alawm,” tiin a chhang anih kha.

          He laiah hian Isua zirtir leh zuitu chi hnih kan hmu a ni. A pakhatna zawk chu, Isua hmangaihna tak tak nei lo leh Isua tana inpe tak tak lo, a phaw vuaka Isua zui ve ngawtte kan hmu a. A pahnihnaah chuan a zirtir sawm leh pahnih te, engkim  kalsana zuitute kan hmu a ni. Isua zirtir an dawnsawn dan pawh a in ang lo tih kan hmu a ni.

          Lal Isua zuitu intite zingah hian Isua tana kan inpekna thuk dan a in ang lo hlein a rinawm. Isua ka zui ti si hian, a ziritirna thenkhat pawm harsa tiin, Isua kalsan ve mai kan duh thin em? Nge kan kalsan mai thin zawk. Nge chutiang ni lova, Lalpa i hnen lovah khawiah nge kan kal chuan ang? Tiin rinawm takin Isua hnungzuitu kan ni zawk.

          Harsatna leh hrehawmnain kan nun a chim buai lai te, lungngaihna nasa tak kan tawrh lai te, Isua kan zui ve naten hlimna aia, lungngaihna min thlen nia kan hriat laite hian, Isua kalsan mai kan duh thin em? Isua zui ve lote leh ringlo mi kan tih te, Isua ngaihsak reng reng loten keini aia malsawmna an dawng nasa nia kan hriat laite hian Isua kalsan mai kan duh thin em?

          Kan nunin harsatna a tawh chang te, manganna nasa takin min chim buai lai te, kan hmaah chhum dum chhah mup mai a awm lai pawhin, “Lalpa, I hnen lovah khawiah nge kan kal ang?” tiin Isua zui tlat ila. Isua chauh hi a ni, kan damna tih hria ila, amah chauh chu a ni kan buainate min chinfel saktu a ni tih hriain Isua hnen lam pan ila, chatuan nun kan neih theih nan Isua i zui zel ang u.

Zanin KTP Hun Hman Dan Tur Ni 24 April, 2020 (Zirtawp Zan)

Zanin KTP Hun Hman Dan Tur Ni 23 April, 2020 (Ninga Zan)

Marka 10: 35-37- Jakoba leh Johana thil dil

Tv. Lalhruaitluanga

BD-IV, ATC

“35Tin, Zebedaia fapa Jakoba leh Johana chuan ani chu an rawn hnaih a, a hnênah, “Zirtîrtu, i hnêna kan dîl tûr apiang che chu i mi tihsak kan duh e,” an ti a. 36Tin, ani chuan an hnênah, “In tân eng nge tihsak che u ila in duh le?” a ti a. 37Tin, anni chuan a hnênah, “I ropuinaah chuan, i ding lamah pakhat, i vei lamah pakhat min ṭhuttîr ang che,” an ti a.” Marka 10:35-37

          Zebedaia fapa Jakoba leh Johana-te chuan Isua hnenah lal ram a din huna a ding lam leh vei lama thut an dil a ni. Jakoba-te unau hian Isua chuan he khawvela lal ram hi thiatin, Rom thuhneihnate chu paih thlain, he khawvelah hian ro a rel dawn niin an ring a. Chu Isua lal ramah chuan nihna pawimawh tak neih a, hotu nih an duh a, chumi avang chuan Isua hnenah a ding lam leh vei lama thut chu an dil ta a ni.

          Jakoba-te unau hian kha leh chen kha Isua an lo zui tawh a, a thil mak tih tam tak an hmu a. Isua thusawi leh zirtirna hrang hrang pawh an ngaithlain an hre em em tawh a ni. Nimahsela, chutianga engkim an hmu chung pawh chuan Isua nihna leh thil tum chu an lo la hrechiang hauh lo mai. Isua chu he khawvela lal ram din turin an la ngai tlat mai a ni.

          Keini ringtu, Pathian thu tha tak taka sawia, ngaithla thin te, Isua zirtirna chi hrang hrang ngaithlaa chhiar thinte zingah pawh hian Isua la hrechiang lo hi a awm theih ang em? Tu nge Isua? Tiin zawhna kan la nei fo thin em.

          Kan nun theuh chhui kir ila, kan nuna Isua hnathawhte, Lal Isuan kan tana thil a tihte ngaihtuah ila. Isua hi ka hrechiang tak tak em? Isua nena intawhna tak tak kan nei tawh em tiin inngaihtuah ila. Isua nena in tawhna tak tak nei turin kan nun i buatsaih ang u.

Zanin KTP Hun Hman Dan Tur Ni 22 April, 2020 (Nilai Zan)

Zanin KTP Hun Hman Dan Tur Ni 21 April, 2020 (Thawhleh Zan)

Johana 20: 24-29

Tv. Lalhruaitluanga

BD-IV yrs

ATC

Isua leh Thoma

24Tin, Isua a lo kal lai khân sâwm leh pahnihte zînga tel ve Thoma, Phîra an tih chu, an hnênah a awm ve lo va. 25Chutichuan, zirtîr dangte chuan a hnênah, “Lalpa chu kan hmu ta,” an ti a. Nimahsela, ani chuan an hnênah, “A kuta thîr khenna serte kha ka hmuha, thîr khenna serahte chuan ka kutzung ka khawih luha, a nâka ka zen meuh loh chuan ka ring lo vang,” a ti a. 26Tin, ni riat hnuah a zirtîrte chu in chhûngah an awm leh a, Thoma pawh an hnênah a awm ve a. Tin, Isua a lo kal a, kawngte chu khâr a ni si a, an zîngah a lo ding ta a, an hnênah, “In chungah thlamuanna awm rawh se,” a ti a. 27Tin, Thoma hnênah chuan, “I kutzungin han khawih la, ka kutte en rawh; i kut han ban la, ka nâkah zen rawh; ring lovin awm suh la, ring rawh,” a ti a. 28Thoman a hnênah, “Ka Lalpa leh ka Pathian i ni,” a ti a, a chhâng a. 29Isuan a hnênah, “Nang chuan mi hmuh avângin i ring a ni; hmu lova ring apiangte chu an eng a thâwl e,” a ti a. Johana 20: 24-29

          Lal Isua ser hlutzia kan hriatna tur chuan Thoma chanchinah hian a chiang hle awm e. Thoma, mi thil chik mi leh a fiahna duh kher mi tan Lal Isua ser hi a pawimawh hle a ni. Chumai bakah, a zirtirte hnenah pawh amah ngei a ni tih hriattir nan a ser hi thil tangkai tak a ni bawk. Thoma hian Lal Isua thawhleh thu hi hre tho tawh mahse, a hliam leh ser a hmuhloh chuan a awih thei lo a ni. Thoma hi a dem awm hran lo e.

          Lal Isua khan vuakna hnu hma tam tak a neih ngei a rinawm, mahse, khang vuakna ser zawng zawng kha chu a thawhpui leh lemlo a ni ang. Amaherawhchu, kraws a an khenbeh kha amah ngei a ni a, a sawi angin a tho leh ngei a ni tih entir nan a kut, a ke leh a naka ser erawh tihreh lo in a thawhpui a ni. Chu chu a zirtirte mai bakah amah ringtu zawng zawngten Isua kan chhinchhiahna leh kan hriatna hmanrua a lo ni ta a ni.

          Ringtu niin Lal Isua hnung kan zui a, theihtawpa rawng kan bawl chung pawh hian ser nei khawpa hliam kan ni thin a, a then te chu sualin a bum thluk avang te, a then te chu kan duh vang ni miahlo a chhungkaw mumal lo leh mi te anga duh ang dinhmun nih theih loh vang a na ngawih ngawih thin te, then te chu chhungkua a sualna in hmun a khuar tlat avang a rum vawng vawng te, a then te chu kan duhthlanna dikloh avanga na em em te, thil tam tak kan nun hliam tu, ser min siamsak tu a awm thin a ni. Chung natna tam tak kar a Lal Isua kan beisei tlatna, Lal Isua a kan innghah tlatna hi a pawimawh hle a. Chu kan ser hmang chuan Lal Isua hian min lo chhinchhiah a, amahah nihna hlu tak a min lo pe zawk a ni.

          Chumai ni lo in, kan chhehvel a mi te pawhin keimahni ah Lal Isua hmel an lo hmu thin zawk a ni. Eng ang pawh chu lo tawng tawhin, lo paltlang tawh mah ila, Lal Isua a kan hlutna hi, amah kan rin phawt chuan a dai ngai dawn lo a, a thar zel zawk dawn a ni. Lal Isua pawh khan ser nung mawi tak kan damna thlen tu a nei tih i hre reng ang u.

Zanin KTP Hun Hman Dan Tur Ni 20 April, 2020 (Thawhtan Zan)

Chawlhhmun Branch KTP Rising Day Chibai Vek U

KRISTIAN ȚHALAI PAWL : CHAWLHHMUN BRANCH

RISING DAY CHIBAI U

April 20, 2020 (Thawhțanni)

Pu Lalfakzual, Secretary

                Pathian hruainain Chawlhhmun Branch KȚP chuan kum 39 a lo tling ve ta reng mai, tun hun kan thlen theihna tura min hruaitu Pathian hnenah lawmthu kan sawi a. Tin, kan hruaitu hmasa te inpekna leh țhahnemngai taka an lo thawh țhin rah sengin tun hun hi kan thleng thei tih kan hria a, kan hruaitu hmasa zawng zawngte chungah lawmthu kan sawi bawk a ni.

Hun hmasa lam : Kum 1981 a Dawrpui Vengthar Pastor Bial Inkhawmpuiin a phalsak angin ni 17.3.1981 (Thawhlehni) zanah Lower Primary School-ah Chawlhhmun Preaching Station chu Bialtu Pastor Rev. Z.T. Sangkhuma'n a hawng a. Preaching Station hawn anih hnu hian Chawlhhmun Kristian Țhalai Pawl pawh ni 20.4.1981 (Zirtawni) zanah Pu Thianga Inah din ve nghal a ni, hetih lai hian Branch hming la pu lovin Chawlhhmun veng KȚP Section tih a la ni.

                Hetih hunlai hian member an la tlem em avangin member lak thuah pawh an la duhthawh hle mai a. Kum 14-40 tih dan awm mek chu kum 45 thleng ni mai se tiin an rel hial a ni. KȚP din anih zan hian hruaitu tur pawh inruat nghal a ni a. Branch OB leh Committee member hmasa ber te chu heng mite hi an ni.

Branch OB te:

Leader                  : Tv. Lalthansanga

Asst. Leader       : Pu Lalngilneia

Secretary             : Tv. Rongailova

Treasurer            : Nl. Thangkhumi

Fin. Secretary    : Nl. Lalpianthangi

Committee member-te:

1. Pu H. Malsawmkima                                 

2. Pu H. Zohmingthanga

3. Nl. Thanpuii                                                  

4. Nl. PC. Lalhmangaihi

5. Tv. Lalmuana                                                

6. Nl. Lalthankimi

7. Nl. Zonunthari                                             

8. Tv. Lalrinsanga

9. Nl. Lalthanțhuami                                      

10. Tv. Kapchawla

Hemi kuma KȚP member hming inziak lut zawng zawng chu 34 an ni.

KTP DIARY

Committee hmasa ber : Ni 26.4.1981 (Pathianni) chhun dar 12:00- ah Tv. Rongailova te inah neih niin, member 10 an committee-a. Hetah hian KȚP Ip sem leh Chawlhni tlai tina Fellowship neih an rel.

Inhlawhna hmasa ber : Kum 1981 April thla tawp lamah Upa Laichhunga lovah an inhlawh a, member 7 thawkchhuakin ₹90 an hlawh.

Ip hawn hmasak ber : Ni 15.7.1981 (Nilai) zan inkhawm banah Ip hawn a ni a, Ip 8 kirin, avaiin ₹22 hmuh a ni.

Thawktu chawm hmasak ber : NI 20.7.1981 (Thawhțan) ah Tirhkoh Lalhmingthanga, Karbi Anglong-a thawk chawm nan ₹115 pek a ni.

Kohhrana chhunluh : Ni 22.11.1981 (Pathianni) ah Biak In sak nan ₹68 Kohhranah chhunluh a ni a. TIn, October thlaah thingpui inna no dawrzawn khat leh a chanve an lei bawk.

                Ni 17.10.1982 (Pathianni) ațangin Chawlhhmun veng KȚP Section chu Branch puitlingah hlankai alo ni ta bawk a ni.

                Chawlhhmun Branch KȚP a din ațanga kum 39 na alo her chhuah meuh chuan, Pathian leh hruaitu lo ni tawh zawng zawngte bakah, member țhahnemngai tak takte zarah Branch KȚP pawhin hma a sawn nasa ve hle tawh mai.

                Sum thawhchhuah kawngah te, thawhlawm thawh leh inkhawm thlengin hmasawnna hmuh tur a awm zel a, inchhiarna hnuhnung berah pawh member 414 kan lo tling ta reng mai.

                Kan thlen chinah hian duhtawk mai lovin, hmasawnna tur tamtak kan la nei tih erawh hrethar leh țheuh ila. Rawngbawl tura chhandam Kristian Țhalai te, Krista leh Kohhran tana ban rinawm leh rintlak rawngbawltu ni turin i inbuatsaih thar țheuh ang u🙏🙏

Zanin KTP Hun Hman Dan Tur Ni 19 April, 2020 (Pathianni Zan)

Zanin KTP Hun Hman Dan Tur Ni 18 April, 2020 (Inrinni Zan)

Kohhran Chhungkaw tin te hnena hriattirna leh Ngenna

Zanin KTP Hun Hman Dan Tur Ni 17 April, 2020 (Zirtawp Zan)

Zanin KTP Hun Hman Dan Tur Ni 16 April, 2020 (Ningani Zan)

Zanin KTP Hun Hman Dan Tur Ni 15 April, 2020 (Nilai Zan)

Zanin KTP Hun Hman Dan Tur Ni 14 April, 2020 (Thawhleh Zan)

Zanin KTP Hun Hman Dan Tur Ni 13 April, 2020 (Thawhtan Zan)

Zanin KTP Hun Hman Dan Tur Ni 12 April, 2020 (Easter Sunday)

Zanin KTP Hun Hman Dan Tur Ni 11 April, 2020 (Inrinni Zan)

Zanin KTP Hun Hman Dan Tur Ni 10 April, 2020 (Zirtawp Zan) (Good Friday)

Zanin KTP Hun Hman Dan Tur Ni 9 April, 2020 (Ningani Zan) (Moundy Thursday)

Zanin KTP Hun Hman Dan Tur Ni 8 April, 2020 (Nilai Zan)

Zanin KTP Hun Hman Dan Tur Ni 7 April, 2020 (Thawhleh Zan)

Zanin KTP Hun Hman Dan Tur Ni 6 April, 2020 (Thawhtan Zan)

Zanin KTP Hun Hman Dan Tur Ni 5 April, 2020 (Pathianni Zan) Palm Sunday

💒 TUMKAU NI : PALM SUNDAY Ni 5 April, 2020 (Pathianni)Zingkar hun hman dan tur 💒

Ni 5 April, 2020 (Pathianni) zing dar 7 hian Chawlhhmun veng mipuite Total Lock Down leh Carfew avanga pawn chhuah theih a ni si lova Tumkau ni hi rualkhai zawka hun kan hman tlan theihnan  ruahmanna siam a ni hetiang in...

Hemi chhung hian Chhung tinte mahni kawt zawl emaw Varandah ah emaw lo chhuah khawm a au rual ni se kan ti...

Tanna hun leh Au kaihruaitu atan hian Pu Lalengmawia, Vice Chairman Task Force a ni a nga, 🎤Au zawh hian Ro min rel sak ang che tih hla play tur a ni a, he hla hi mipuiten kan lo zawm dawnnia.....

Hun  tawp 🙏🏻tawngtai leh lawm thusawina  hi Upa C.Hrangsiama Task Force member in a nei ang.

Chhungtinten he hun hi ngai pawimawh a, he programe pawimawh tak hi hmang theuh turin kan in sawm tak meuh meuh a ni.

Sd/-

Secretary

Local Task Force

Chawlhhmun

Zanin KTP Hun Hman Dan Tur Ni 4 April, 2020 (Inrinni Zan)

Zanin KTP Hun Hman Dan Tur Ni 3 April, 2020 (Zirtawp Zan)

Zanin KTP Hun Hman Dan Tur Ni 2 April, 2020 (Ningani Zan)

Zanin KTP Hun Hman Dan Tur Ni 1 April, 2020 (Nilai Zan)