Zanin KTP Hun Hman Dan Tur Ni 27 April, 2020 (Thawhtanni Zan)

Matthaia 6: 33-34- A ram leh a felna zawn hmasak

Tv. Lalhruaitluanga

BD-IV, ATC

 “A ram leh a felna chu zawng hmasa zâwk rawh u; tichuan, chûng zawng zawng chu a pêk belhchhah dâwn che u nia. Chutichuan, a tûk atân lungkham suh u, a tûk chuan ama tân a lungkham chawp dâwn si a. Ni khat atân ni khat hrehawm chu a tâwk a ni.” Matthaia 6:33-34

          Lal Isua tlang chunga a thusawiah hian nun dan tur pawimawh tak tak a sawi a. A thu ngaithlatute hnenah khan zirtirna tha tak tak leh pawimawh tak tak a pe a ni.

          Mihring kan khawsakna atana kan nitin mamawh thil pawimawh zualte chu, ei leh in, silh leh fen leh chenna inte hi a ni awm e. Heng neih tum hian mi tupawh mai hi kan hmanhlel thin a, neih dan kawng kan zawng thin a ni. Palestina ramah khan heng nitin mamawhte hi mi retheite tan ban phak loh chang a awm thinin a rinawm.

          Zirtirte khan engkim kalsanin Lal Isua kha an zui a, chuvang chuan lungkham an ngah hlein a rinawm. Chutiang anih mek lai chuan Isua chuan khawvel thil lungkham lova, Pathian ram leh Pathian duh zawng ngaihtuah hmasa turin a zirtir a, zawng chhunzawm zel turin a ti a ni.

          Ringtute hi kan nitin mamawh tlakchham kan hlauhna hian Pathian min hlat tir fo thin a, a rawngbawlte pawh a ti har fo thin a ni. Kan nitin mamawh thawk chhuak turin kan hmahlel thin a, kan buai a, Pathian ram thu reng reng pawh kan ngaihtuah hman lo fo thin a ni. Pathiana rinna nghah aiin thildangah kan nghat a, kan nitin mamawh neih chu kan damchhan ber emaw kan ti thin a, neih tam lehzual tumin kan hmanhlel thin a, chu chuan Pathian min hlat tir thin a ni.

          Lal Isua chuan, chung zawng zawng ai chuan Pathian ram leh Pathian duh dan chu ngaipawimawh hmasa ula, tichuan, in nitin mamawh chu ka pe ang che u min ti thung a ni. Miin Pathianah rinna a nghah tak tak chuan, Pathianin a mamawh chu a pe dawn a ni tih hi Lal Isua zirtirna a ni. Miin, Pathian ram leh Pathian duh dan a ngaihpawimawh tawh chuan he khawvela a mamawh ber Isua a nei a, Isua chu kan mamawh ber a nih avangin, thil dang chu engmah lo mai a lo ni zawk thin a ni.

          Lal Isua ber kan neih tawh chuan khawvel lungkhamna ten kan nun a tibuai phak tawh lova, rethei leh hausaa awm dan chu Isuan min zirtir tawh zawk a lo ni. Eng dinhmunah pawh ding ila, Pathian ram leh a felna kan zawn chhung chuan hmangaihna leh induhsaknain kan nunah ro a rel ang a, nun hausa kan nei ang a, chu nun chuan midang ngaihpawimawhna nun min pe ang a, kan intanpui tawn ang a, kan indawm kang tawn zawk dawn a ni. Pathian hian kan nuna pawimawh ber nih hi a duh ber a ni. Kan nunah hian thil dang zawng aiin Pathian i thlang ber zawk ang u.