Zanin KTP Hun Hman Dan Tur Ni 30 June, 2020 (Thawhleh Zan)

Tirkohte Thiltih 21: 13- Isua vanga tuar

 Tv. Lalhruaitluanga

BD-IV, ATC

 Paula chuan a chhâng a, “Eng in ti nge ni in ṭah in ṭaha, ka lung in tihchhiat? Lalpa Isua hming avâng chuan Jerusalem khuaa phuar chang ka huam lo va, thih pawh ka huam asin,” a ti a. Tirkohte Thiltih 21: 13

          Tirhkoh Paula kha a hun hmasa lamah chuan Kohhran ho tiduhdahtu, ringtute mana tan ina khung thin a ni a. Stephena lunga den hlum a nih tum pawh khan a phusa ber pawlah a tang a nih kha.

          Nimahsela, Isua nen an intawka, Isua nihna tak tak a hriat hnu chuan a nunah danglamna nasa tak a thleng a. Kohhran tiduhdaha, ringtute tan ina khung thintu kha, Kohhran tana mi tangkai leh Isua ke bula mite hruiatu a ni ta a ni. Chumai a la ni lo, Isua avang chuan phuar mai pawh ni lo, thih hial pawh a huam a ni.

          Isua neitu, Isua hre chiangtu chuan, Isua avanga tuar thei nih hi an lawm zawk a. Isuan an tana a tuarna an hriat avangin, an hrehawm tuar ve chhunte chu engahmah an ngai lova, Isua avang chuan engkim tuar an huamin, chân hial pawh an huam a ni.

          Isua neitu, Isua avanga ropuina leh mawina chân ngam leh tuar ngam zel turin ka rinna ti chak ila. Engkim kan tih apiang hi Isua avanga ti kan nih theihna turin Isua lam i en zel ang u.

Vawiin 30.6.2020 (Thawhlehni) hian Chawlhhmun Branch KTP Committee te chuan veng chhunga CQF Centre hrang hranga awm te leh duty te chhun thingpui kan buatsaihsak a ni

Zanin KTP Hun Hman Dan Tur Ni 29 June, 2020 (Thawhtan Zan)

Zanin KTP Hun Hman Dan Tur Ni 28 June, 2020 (Pathianni Zan)

Philippi 4:4- Lalpaa lawm

Tv. Lalhruaitluanga

BD-IV, ATC 

Lalpaah chuan lâwm fo rawh u; ka ti leh pek ṭhîn ang, lâwm rawh u. Philippi 4:4 

          Philippi khuaah hian Kohhran chhungah leh pawnah buaina neuh neuh a awm a. Paula ngei pawhin beitu leh dodaltu a tawk a ni. Nimahsela, chutiang thil chuan hual vel mahsela Lalpaah chuan lawm turin a ti a ni.

          He lai changah hian Paula hian Philippi amite chu lawm reng turin a ti a. Englai pawha lawm reng turin thu a pe a ni. Nimahsela, an lawmna chu he lei danah a ni lova, an dinhmun that leh dinhmun san avangte, a thil tawn leh an thil hmuhahte ni lovin. Lalpaah chuan englai pawha lawm reng turin a ti zawk a ni.

          Ringtute chu kan lawmna innghahna ber chu Pathian a ni a. Kan hlawhtlinna te, kan hausakna te, kan hriselna leh kan hmelthatna leh kan pian nalhna te hi kan lawmna tur a ni lova. Lalpa zawk hi kan lawmna tur a ni. Lalpaah chuan englai pawhin kan lawm reng tur a ni.

Zanin KTP Hun Hman Dan Tur Ni 27 June, 2020 (Inrinni Zan)

Zanin KTP Hun Hman Dan Tur Ni 26 June, 2020 (Zirtawp Zan)

Sam 84:10- Pathian nena len dun

 Tv. Lalhruaitluanga

BD-IV, ATC

 I biak in hung chhûng kawtlaia ni khat awm hi, ni sângkhat aiin a ṭha zâwk si a. Suahsualna puan intea awm ai chuan, Kan Pathian ina kawngkhâr vêngtu nih pawh ka duh zâwk a ni. Sam 84:10

           He Sam hi Kora fapate fakna hla a ni a. Anni hi Temple-a rawngbawltu an ni a. Thil dang tih theih loh hrehawmzia an hre hlein a rinawm. Temple-ah rawng an bawl a, hmun dangah an kala an tel ve a rem lo a ni. Chutiang chu ni mahse, Templea awm hlutzia an hre chiang em em thung a ni.

           Hmun dangah ni tam tak hlim taka hman ai chuan, Pathian mithmuhah ni khat lek awm pawh an tan a țhat zawk ziate, suahsualna puanina awm ai chuan, Biak Ina rawngbawlnaa an ngaihsan loh leh hniam ber anga an ngaih, kawngkhar vengtu nih pawh a thlang zawk a ni.

           Khawvel hlimnaten min chim mek a, khawvel changkanna leh nawmnaten min chim buai mek a ni. Nimahsela, ringtute tan chuan Pathian hnena awma, Pathian nena lendun hi kan tan a țha ber a ni tih i hre reng ang u. Pathian nena lendun hi ringtute tan chuan a țha a, kan chakna a ni tih i hre reng ang u.

Zanin KTP Hun Hman Dan Tur Ni 25 June, 2020 (Ningani Zan)

Zanin KTP Hun Hman Dan Tur Ni 24 June, 2020 (Nilaini Zan)

Philippi 2:7- Tawrhpuitu Isua

Tv. Lalhruaitluanga

BD-IV, ATC

 mihringte anga lo piangin, bawih angah a insiam a, amah leh amah a intitlâwm ta zâwk a. Philippi 2:7

           Mi thenkhat chuan Pathian hi hla takah awmin, khawvel thil inlumleh dan velah hian engmah a inhnamhnawih lova. Khawvel hi a siam a, chu bak chu khawvelah hian hna a thawk zui tawh lo nia ngaite an awm bawk.

           Khawvelah hian tawrhna chi hrang hrang a lo thleng thin a. Harsatna leh manganna chi hrang hrangin min tlak buak thin. Chung ang hun kan tawh lai chuan hrehawm kan tiin, Pathian hi hla takah a awm ta daih niin kan hre thin a ni.

           Nimahsela, kan hriat reng tur chu, Pathian pawh hian tawrhna a lo paltlang tawh a ni. Pa chuan a fapa Isua Krista chu khawvelah a rawn tir a. Mihring famkim leh mihring tak tak niin khawvelah a rawn kal a. Mihringte tawrhna a rawn tawmpui a. Mihring nun zia chu Amah ngeiin a takin a rawn hria a ni.

           Chuvang chuan kan tawrhnaah hian Pathian hian min tawrhpui a, mihringte nun dan tak tak chu a tak ngeia a hriat avangin, kan tawrhna chi tinrengah hian Pathian chu a awm a ni. Chuvang chuan kan chungah engpawh thleng sela, kan biak Pathian hian engkim a lo paltlang tawh tih hriain, a hmel hmuh tumin chhel takin i bei zel ang u.

Zanin KTP Hun Hman Dan Tur Ni 23 June, 2020 (Thawhlehni Zan)

Zanin KTP Hun Hman Dan Tur Ni 22 June, 2020 (Thawhtanni Zan)

Johana 16:33- Isuaa Thlamuanna

 

Tv. Lalhruaitluanga

BD-IV, ATC

 

Hêng thu hi in hnênah ka sawi tawh hi, keimahah hian in thlamuanna tûrin. Khawvêlah hian hrehawmin in awm ṭhîn; nimahsela, thlamuang takin awm rawh u, keiin khawvêl ka ngam ta,” a ti a. Johana 16:33

 

          Ringtute tan khawvel hi hmun nuam ber leh tha ber a ni lo. Chu chu Lal Isua ngei khan a hmu a, a tem vek a ni. Chuvang chuan a zirtirte bulah pawh khan khawvelah hian hrehawma an awm thin thu a hrilh a nih kha.

 

          Nimahsela Isua chuan chung hrehawmna leh mangannaah pawh chuan Amahah chuan thlamuanna a awm a ni tih a hrilh a ni. Khawvelah hi chuan hrehawmna a awm a, nimahsela Isuaah chuan thlamuanna a awm thung a ni. Chu chu Isuan a zirte hnenah a hrilh a ni.

 

          Khawvelah hi chuan harsatna tam tak kan tawk thin a, mangang leh lungngaiin kan awm thin. Nimahsela, Isua chuan khawvel hi a ngam tawh a, Amahah chuan thlamuanna a awm a ni.

 

          Khawvelah hian hrehawmna leh manganna tawkin, hun harsa leh hun khirh tak tak tawk thin mah ila Isuaah chuan thlamuanna kan hmu thin a ni. Isuaa thlamuanna kan neih theih nan Isua lam i en reng ang u.

Zanin KTP Hun Hman Dan Tur Ni 21 June, 2020 (Pathianni Zan)

KTP News 21.6.2020

Zanin KTP Hun Hman Dan Tur Ni 20 June, 2020 (Inrinni Zan)

Thupuan 3:20- Sawmna

Tv. Lalhruaitluanga,

BD-IV, ATC

 

Ngai teh, kawngkhâr bula dingin ka kik hi; tu pawhin ka aw hriaa kawng a hawn chuan, a hnênah ka lût ang a, a hnênah zanriah ka ei ang a, ani pawhin ka hnênah a ei bawk ang. Thupuan 3:20

 

            Laodikei Kohhran kha a din tirh lai velte kha chuan kohhran chak țha tak leh țhangduang tak a ni. Nimahsela hun a lo kal zel a, a tun hma nun kha a phak ta lo em em mai a, kohhran tih tlak pawh a awm tawh meuh lo a ni.

 

            Chuti khawpa tlu chhia leh tlachhia pawh chu ni mahsela, Pathian chuan a ensan hauh lo mai. Ngaiteu kawngka bula dingin ka kik hi tiin, kawngka bulah hnai takah a la awm reng a ni. Chumai ni loin, a aw hriaa kawng hawntu hnenah chuan zanriah a ei tur thu a sawi a ni. Hei hian zanriah ei satliah ni loin, in pawhna tak tak, in zawm lehna a kawk a ni.

 

            Keini pawh kan nunah hian hnungtawlh changte, chauh changte kan tawk țhin. Tun hmaa kan chak reng ang khan kan chak ta lova, Pathian lak atangin hla takah awm nitein kan inhre țhin. Mahse, Pathian chu kan bulah a awm a, kan thinlung kawngkhar a la kik reng a ni.

 

            Pathian aw hre thei turin inbuatsaih ila, a thu chhiarin tawngțai ila. Tichuan, kan hnenah a rawn lut ang a, Amah nen inzawmna kan nei leh dawn a ni.

Zanin KTP Hun Hman Dan Tur Ni 19 June, 2020 (Zirtawpni Zan)

Zanin KTP Hun Hman Dan Tur Ni 18 June, 2020 (Ningani Zan)

Sam 48:14- Pathian- Min hruaitu

Tv. Lalhruaitluanga

BD-IV, ATC

He Pathian hi kumkhaw tlaitluana kan Pathian a ni dâwn si a: Thih thleng pawha min hruaitu a ni ang. Sam 48:14

            Thuthlung Hluia Pathian nihna ropui tak kan hmuh chu 'Hruaitu' a nihna hi a ni. Hruaitu tih hi Hebrai tawng chuan 'nakha' tih a ni a. A awmzia chu hruai, khalh, kawng dik kawhhum, tum hlenpui, veng him, chelh leh thlamuan tihna a ni awm e. Pathia chu hruaitu a ni kan tih huan heng thu mal hrang hrang hi a huam kim vek a ni.

            Israel fate chanchinah Pathian chu hruaitu a nihzia kan hmu a. Israel fate chanchin kan chhiar chuan Pathian ropui zia leh hruaitu a nih zia kan hmu a ni. Israelte fate chanchinina a tarlan ber pakhat chu an chhehvel hnam hruaitu leh pathiante aia kan biak Pathian chu hruaitu dik leh ropui a nih zia lantir kha a ni.

            Khawvelah thiamna leh hmasawnna a thang zel a, Pathian mamawh lohna leh Pathian tel loa awm thei nia inngaihna a nasa ta hle mai. Chutiang boruak karah chuan ringtute hian Pathian hi min hruaitu atana kan pawm a, min hruaitu tura sawm reng hi kan tih tur a ni. Pathian chu hruaitu tha, kawng dik min kawhhmuh a, a tumte min hlenpuitu a ni a. Kan tunlai khawvel boruak hrang hrangin min chim mek lai hian Pathian hruaina hnuaiah i intulut zel ang u.

Zanin KTP Hun Hman Dan Tur Ni 17 June, 2020 (Nilaini Zan)

Zanin KTP Hun Hman Dan Tur Ni 16 June, 2020 (Thawhlehni Zan)

Genesis 50:20- Pathian remruat

Tv. Lalhruaitluanga

BD-IV, ATC

Nangni zawngin ka chungah thil sual tih in rilrûk a; nimahsela, Pathian chuan vawiin ang hian mi tam tak nungdama chhanhimna tûra thil ṭhaa chantîr a rilrûk zâwk a lo ni si a. Genesis 50:20

            Kan nunah hian harsatna leh tawrhna nasa tak a thleng thin a. Hriatthiam har kan tiin eng nge chutiang chu kan tuar bik kan ti thin. Josepha pawh kha a nunah harsatna nasa tak a thleng a. A unauten an huaa, khuarkhurumah an thlak a, sumdawng hnenah an hralh a. Chumi hnuah pawh chuan harsatna nasa tak a tawk a ni.

            Josepha khan a nuna thil thlengah vuina tur tam tak a nei a ni. Vui pawh nise tuman kan demin a rinawm loh. A unaute chungah phuba la pawh nise, a awm tih puitu tam tak an awm ngei ang. Nimahsela, Josepha chuan Pathian thil tum kha a hmu chiang em em a, Pathian remruatna chu a tha tih a hria a, a ring tawp mai a ni.

            A unaten, a chungah thil tha leh sual tih an rilruk, khawvel ata nuai bo an tumna chu, Pathian chuan thil tha zawk a lan chhuah theihna turin a lo ti reng zawk si. A unauten Josepha chunga an thil tih kha, Pathian chuan Josepha leh a chhungte leh an hnam damna atan a lo ti reng zawk a ni.

            Harsatna, manganna kan tawhte hi thil nuam a ni lova, thil hrehawm leh kawng harsa a ni. Nimahsela, Pathian engkim chunga roreltu chuan kan tana tha tura a lo ruat a ni reng zawk si. Pathian remruatna chu a tha a, chu chu keini tan hlawkna a ni tih hi pawm tawp mai ila. Tunah kan hrethiam rih lo a ni maithei, mahse nakinah chuan Pathianin min la hrilhfiah ngei dawn a ni.

Zanin KTP Hun Hman Dan Tur Ni 15 June, 2020 (Thawhtanni Zan)

Zanin KTP Hun Hman Dan Tur Ni 14 June, 2020 (Pathianni Zan)

Rom 8:32- Engkim kan ta

Tv. Lalhruaitluanga

BD-IV, ATC

            Ama Fapa ngei pawh zuah lova kan zaa aia petu chuan, thil zawng zawng pawh a thlâwnin min pe tel lo vang em ni? Rom 8:32

            Mi tupawh mai hian nun nuam tak neih kan duh a. Hlim taka nun hmana, kan thil tihah hlawhtlinna chan kan duh theuh mai. Lungngaihnate, natna te hi tuman tawh kan duh lova, a nuam thei ang bera nun hman hi kna duh theuh awm e.

            Pathian chuan thil harsa tak mai kan tan tiin, a fapa neih chhun Isua Krista chu kan tan min pe a ni. Chung thil harsa lutuk tak mai kan tan a a pe thei anih chuan eng vangin nge a aia awlsam zawk, thil zawng zawng pawh chu min pe thei ang tih hi a chiang em em a ni.

            Mahse, mi tam tak chuan Pathian atang chuan thil tha leh lawmawm, hlimna, lawmna, hlawhtlinna chauh dawng turin kan in ngai thin. Kan Pathian thuin a tarlan duh zawk chu, thil zawng zawng kan tana tha tur chu Pathian hian a thlawnin min pe dawn a ni tih hi a ni. Thil engkim, Isua Krista hniakhnunga kan zui theihna tur leh, Amah ang kan nih theihna turin min pe zawk dawn a ni.

            Thil zawng zawng tihah hian natnate, tahnate leh lungngaihnate pawh a tel a ni tih theihnghilh lo ang u. Nimahsela, chung thil zawng zawng chu Pathianin, Amah kan hnaih theih nan leh kan thatna turin min pe zawk a ni tih hi hre reng thung ang u.

Zanin KTP Hun Hman Dan Tur Ni 13 June, 2020 (Inrinni Zan)

Zanin KTP Hun Hman Dan Tur Ni 12 June, 2020 (Zirtawp Zan)

Mika 7:7,8 - Pathiana rinna nghah

Tv. Lalhruaitluanga

BD-IV, ATC

Kei erawh chuan Lalpa lam ka en ang a, ka chhandamna Pathian chu ka nghâk ang; ka Pathian chuan mi ngaithla dâwn a ni.  Aw ka hmêlma, mi diriam mai suh! Ka tlûk hun chuan ka tho leh ang; thima ka ṭhut pawhin Lalpa chu ka tân êng a ni ang. Mika 7:7,8

            Zawlnei Mika hunlai hian Israelte chuan Pathian an hnawl nasain, Pathian ngaihsak lohna a nasa hle mai a. Mipuite chuan sual chi hrang hrang an ti a, hlemhletna te, thil tha lo tam tak an ti a, thisen chhuahna pawh a thleng thin ni ngeiin a lang a ni.

            Chutiang ang sualna leh Pathian ngaihsak lohna chuan Zawlnei Mika chu hual vel mahsela, ani chuan, Lalpa lam en tlat tur leh Pathian a rin tlat tur thu a sawi a ni. Mi tam takin, Pathian an ngaihsak lova, Pathian an hawisan, sual chi hrang hrang an tih lai pawhin Mika chuan Pathian en tlat a tum a ni.

            Kan tunlai khawvel han thlir ila, Pathian ngaihsak lohna leh sual chi hrang hrangin min hual nasa em em a. Chutiang anga sualin min hual vel avang chuan mi tam tak chu sualah kan tlu a, Pathian pawh ngaihsak lem loin kan leu vel mai mai thin a ni.

            Nimahsela ringtute chu sualna chhumpuiin min hual velin, Pathian ngaihsak lotuten min hualin min diriam mahsela, Pathian rin tlat a, Pathian nghah reng chu kan tih tur a ni. Chutianga kan nghah reng chuan Pathian chuan min ngaithla anga, kan tluk pawhin min kai tho leh dawn a ni. Chuvang chuan Pathianah chuan rinna nghat tlat ila, Amah chu beiseiin, i nghak fan fan ang u.

Zanin KTP Hun Hman Dan Tur Ni 11 June, 2020 (Ningani Zan)

Zanin KTP Hun Hman Dan Tur Ni 10 June, 2020 (Nilai Zan)

Johana 14:1&2- Kan tana buatsaih in

Tv. Lalhruaitluanga

BD-IV, ATC

“In thinlung mangang suh se; Pathian in ring e, kei pawh mi ring ve rawh u.  Ka Pa inah awmna tam tak a awm a, a awm loh chuan ka hrilh tawh tûr che u a ni; in tân hmun siamin ka kal dâwn hi. Johana 14:1&2

          Lal Isua khan hun rei loteah  a zirtirte kha hlauhna leh manganna nasa takin a tuam vel dawn tih a hre lawk vek a. Chutih hunah chuan zirtirte tan chuan Pathiana rinna nghah a pawimawh dawn em em tih pawh a hria a ni. Chuvang chuan Isua chuan a zirtirte chu mangang lo tur leh Pathian leh Amah chu ring tlat turin a chah a ni. An mangan loh chhan tur chu Isuan, vanah zirtirte tan awmna a awm thu leh chu hmunah chuan an tan hmun a siam dawn vangin mangang lo turin a hrilh a ni.

          Khawvelah hian thlabarin kan awm a, harsatnate min hual vela, kan mangang a ni. Harsatna chi hrang hrangin min tlakbuaka, kal ngaihna hre loin kan awm a, kan nuna thil thleng mek chu kan hrethiam lova, kan thil tawn mekte chu hriatthiam har kan ti a, pawm harsa kan ti em em a ni. Chung hun a lo thlen chuan ‘Pathian hi a awm lo em ni?’ tiin zawhna kan nei thin a ni.

          Nimahsela, kan Pathian thu chuan mangang lo turin min hrilh a, Pathian ring tlat turin min chah a ni. Pathian thu chuan kan tan vanah hmun a awm thu min hrilh a, min hrilh lohna hmun reng reng a awm lo a ni. Kan tan hmun awm lo sela, Isua khan min hrilh ngei ang le. Lal Isua zirtirna zawng zawngte kha dawt a ni lova, thudik a ni.

          Kan nunin harsatna a tawh chang nite, kan hun tawng mekah lawmna tur kan hmu lo a nih pawhin, Isua chu kan tan hmun siamin a kal a ni tih hria ila, chu kan tana hmun siamah chuan kan awm theihna turin Pathian i ring tlat ang u.

Zanin KTP Hun Hman Dan Tur Ni 9 June, 2020 (Thawhleh Zan)

Zanin KTP Hun Hman Dan Tur Ni 8 June, 2020 (Thawhtan Zan)

Zanin KTP Hun Hman Dan Tur Ni 7 June, 2020 (Pathianni Zan)

Zanin KTP Hun Hman Dan Tur Ni 6 June, 2020 (Inrinni Zan)

I Samuel 16:7&8 Thinlung lam entu Pathian

Tv. Lalhruaitluanga

BD-IV, ATC

Nimahsela, Lalpa chuan Samuela hnênah, “A hmêl lam emaw, a sân lam emaw en suh; ani hi chu ka duh loh a ni. Lalpa chuan mihring en dân angin a en ve si lo va; mihring chuan pâwn lama lan dân an en ṭhîn a, Lalpa erawh chuan thinlung lam a en zâwk ṭhîn a ni,” a ti a. 8Tin, Jesaia chuan Abinadaba a han ko va, Samuela hmaah chuan a kaltîr a. Ani chuan, “Hei pawh hi Lalpa thlan a la ni lo,” a ti a. I Samuel 16:7&8

            Thinlung hi engtiang taka pawimawh nge tih chu sawifiah thiamlo mah ila, a hretu vek kan ni ngei ang. Thinlung taka min duhsak tu leh thinlung taka kan tana thil ti thin te an hlutzia chu kan hre theuh awm e. Thinlung a amah thuawih tu, amah ngaihsaka, amah dah pawimawh tu te Pathian chuan a lawm a, a hre reng thin a ni.

            Engvanga Pathian hian thinlung duh em em nge a nih ang le. Mihring tak pawhin han ngaihtuah ila, thinlung a kan hnaih, thinlunga kan pawm, thinlunga kan duh leh ngainat, thinlung a kan hmangaih ten kan nun an hruai theih zia te, kan hmalam hun zel a hril theih zia te ngaihtuah hian Pathian in thinlung a duh nachhan chu kan hrethiam uar uar ang.

Kan thinlung kan hlan tawhna, kan ngaihzawng an ni emaw, chhungte, thiante, emaw, tu pawh engpawh pawh ni se...an tan thil tha ber kan duh a, kan in pe thuk hle thin a ni. Chuvang chuan, Pathian hnena kan thinlung kan pek chuan kan nun zawng zawng ama lamah kan dah ang a, kan nunkawng hruaitu a ni ang a, a duhzawng tih kan duh ang a, kan hmangaih ang a, kan ngai a, inkungkaihna tha kan siam ang a, harsatna leh buaina tawh pawhin then kan hlau ang a, rinawm taka a tana awm kan duh zawk dawn a ni. Chuvang tak chuan Pathian hian kan thinlung a en thin a ni. Thinlung en tlak kan ni em tih kan inennawn fo dawn nia.

Zanin KTP Hun Hman Dan Tur Ni 5 June, 2020 (Zirtawp Zan)

Zanin KTP Hun Hman Dan Tur Ni 4 June, 2020 (Ningani Zan)

Leviticus 11:45 - Tih Thianghlimna

Tv. Lalhruaitluanga

BD-IV, ATC

In Pathian ni tûra Aigupta ram ata hruai chhuak chhotu che u Lalpa chu ka ni si a. Kei ka thianghlim si a; chuvângin, nangni pawh in thianghlim tûr a ni. Leviticus 11:45

            Mi tupawhin Pathian chu a Lalpa leh Chhandamtua a pawm atangin a nunah thil pathum pawimawh em em mai a thleng a chung te chu: Siamtharna (Regeneration) piantharna tih pawhin sawi thin, thiamchantirna (Justification) leh tihthianghlimna (Sanctification) te hi an ni.

            Pathian zarah Piantharna leh Thiamchanna te chu chang tawh mah ila khawvel kan awm chhunga kan chan nawn fo tur chu Tihthianghlimna hi a ni. He tihthianghlimnaah hian Pathian leh mihring an thawk dun a, Pathian kuta dah vek theih a nilo a ni. He tihthianghlimna hi mi a pianthar atangin a chang nghal a chu thianghlimna kawngah chuan mihring leh Pathian hnatawh kal kawp te hi kan hriat a tha hle mai.

1. Pathian hnathawh: Isuan Johana 15-ah khan amah a awm reng turin min ti a chu chu kan rah theih natur pawimawh ber a ni. Keimahniah Pathian in hna a thawh loh chuan keinin mahni intithianghlim turin theihna kan neilo. Hemi avang tak hian a ni Thlarau Thianghlim pek a kan awm ni. 1 Thessalonika 5:23-ah chuan “Tin, remna Pathian ngei chuan in pumin tithianghlim che u rawh se; tin, in thlarau leh, in rilru leh in taksa chu kan Lalpa Isua Krista lo kal hunah chuan, sawisêl bovin a puma humhimin awm rawh se.” tih kan hmu a. Chuvangin tihthianghlimna hi Pathian hnathawh a ni kan ti thei ang.

2. Mihring hnathawh: Mihring hnathawh hi pahnih in a then theih a chung te chu: Pathian rinna emaw Pathian a innghahna tih leh thuawihna te an ni. Rom 12:1 ah  chuan “inthawina nung leh, thianghlim leh, Pathian lawm tlâk ni tûrin, in taksa chu inhlânah ka ngên a che u” tih kan hmu a hei hi Pathian a innghahna tiin kan sawi thei ang. Impumpekna (Surrendering ) ah chuan mahni kan thu tawhlo a min neitu thu thu awm tur kan ni.

            Chumi dawt leh ah Rom 8:13 ken en leh chuan “taksa thiltihte Thlarauva in tihhlum ṭhin chuan in nung ang.” tih kan hmu a. Tin, Heb. 12:14 ah “Mi zawng zawng nêna inremna leh thianghlimna ûm rawh u, chumi thianghlimna lovin tu mân Lalpa an hmu lo vang:” tih hian thianghlimna chu kan ûm tur a ni tih a tarlang a. Hei hian thianghlimna chuan mihring tih tur thuawihna a keng tel kan ti thei ang.

Engvangin nge kan thianghlim ang?

1. Pathian laka bo tawh te chu amah Pathian nena inzawmna nghet kan neih leh nan tih thianghlim kan ngai a ni.

2. Pathian kan hmuh theih natur a nih avangin tih thianghlim kan ngai a ni.

3. Kan thianghlim zelnaah chauh Lalpa annaah kan thang a, chumiah chuan rah duhawm tak kan chhuah thei thin a. Kan nun pawh alo zalen zel zawk thin.

Zanin KTP Hun Hman Dan Tur Ni 3 June, 2020 (Nilaini Zan)

Zanin KTP Hun Hman Dan Tur Ni 2 June, 2020 (Thawhleh Zan)

Luka 10:27- 29 - Vengte Hmangaih

Tv. Lalhruaitluanga

BD-IV, ATC

Tin, ani chuan, “ ‘Lalpa i Pathian chu i thinlung zawng zawngin, i thlarau zawng zawngin, i chakna zawng zawngin, i rilru zawng zawngin i hmangaih tûr a ni,’ ‘Nangmah i inhmangaih angin i vêngte pawh i hmangaih tûr a ni,’ tih hi,” a ti a, a chhâng a. Tin, ani chuan a hnênah, “I chhâng dik zet mai e; chutiang chuan ti la, i nung ang,” a ti a. 

Ani erawh chuan thiam inchantîr a tum a, Isua hnênah, “A nih leh, ka vêngte chu tute nge ni?” a ti a. Luka 10: 27- 29

            Judate chuan vengte tih hi a tlangpuiin an hnampuite leh an saphunte sawina atan an hmang țhin a. Judate chuan anmahni huang chhunga thil țha intihtawnsak chu Pathian laka an mawhphurhna niin an ngai a ni.

            Lal Isuan, “Nangmah i inhmangaih angin i vengte hmangaih rawh” a tih hian mi dangte chu an nihna ang anga hmangaih bakah mi dangte dinhmun leh nihna țawmpuia mahni inhmangaih anga mi dang hmangaih kha a sawi tum chu a ni. Vengte tih hian Juda mi chauh a huam lo a, mi tupawh a huapzia tarlan nan, Judaten an ngaihsan loh em em, Samari mi țha chanchin kha Isuan a sawi ta a ni.

            Pathian thuin, “Nangmah i inhmangaih angin i vengte hmangaih rawh” a tih ang hian kan bul vel amite hi keimahni kan inhmangaih ang chiahin kan hmangaih tur a ni. Mamawh an neih chu theihtawpin phuhruksak kan tum tur a ni.

            Khawvelin hun khirh tak kan tawng mek a. Kan ram pawh kan bang bik lo. Kan hma hunah hian harsatna nasa tak pawh kan tawk a ni thei. Hnathawk thei loin, pawn chhuak thei loin kan inkharkhip leh pawh a la ngai leh maithei. Chutiang hunah chuan, kei hian thil lei zo zung zung ila, midang chuan chang ve lo mahse, keiin ka chan chuan a tawk mai tih rilru kan pu ang nge? Ka neih ang ang hi a nei lo zawkte, a mamawh zawkte tan ka pe dawn? Tih rilru kan put dawn le?

            “Nangmah i inhmangaih angin i vengte hmangaih rawh” tih thu hian kan nun min en let sela a țha hle mai. Rev. Lalsawma chuan, “I țanpui ngai apiang, an mamawhna che a nasat zawk chhung chu nangma mamawh ngaihsak lovin tanpui la, mahni anga vengte hmangaih i ni ang” a ti a. Chu rilru chu put I tum țheuh ang u.

Zanin KTP Hun Hman Dan Tur Ni 1 June, 2020 (Thawhtan Zan)