Zanin KTP Hun Hman Dan Tur Ni 12 June, 2020 (Zirtawp Zan)

Mika 7:7,8 - Pathiana rinna nghah

Tv. Lalhruaitluanga

BD-IV, ATC

Kei erawh chuan Lalpa lam ka en ang a, ka chhandamna Pathian chu ka nghâk ang; ka Pathian chuan mi ngaithla dâwn a ni.  Aw ka hmêlma, mi diriam mai suh! Ka tlûk hun chuan ka tho leh ang; thima ka ṭhut pawhin Lalpa chu ka tân êng a ni ang. Mika 7:7,8

            Zawlnei Mika hunlai hian Israelte chuan Pathian an hnawl nasain, Pathian ngaihsak lohna a nasa hle mai a. Mipuite chuan sual chi hrang hrang an ti a, hlemhletna te, thil tha lo tam tak an ti a, thisen chhuahna pawh a thleng thin ni ngeiin a lang a ni.

            Chutiang ang sualna leh Pathian ngaihsak lohna chuan Zawlnei Mika chu hual vel mahsela, ani chuan, Lalpa lam en tlat tur leh Pathian a rin tlat tur thu a sawi a ni. Mi tam takin, Pathian an ngaihsak lova, Pathian an hawisan, sual chi hrang hrang an tih lai pawhin Mika chuan Pathian en tlat a tum a ni.

            Kan tunlai khawvel han thlir ila, Pathian ngaihsak lohna leh sual chi hrang hrangin min hual nasa em em a. Chutiang anga sualin min hual vel avang chuan mi tam tak chu sualah kan tlu a, Pathian pawh ngaihsak lem loin kan leu vel mai mai thin a ni.

            Nimahsela ringtute chu sualna chhumpuiin min hual velin, Pathian ngaihsak lotuten min hualin min diriam mahsela, Pathian rin tlat a, Pathian nghah reng chu kan tih tur a ni. Chutianga kan nghah reng chuan Pathian chuan min ngaithla anga, kan tluk pawhin min kai tho leh dawn a ni. Chuvang chuan Pathianah chuan rinna nghat tlat ila, Amah chu beiseiin, i nghak fan fan ang u.