Zanin KTP Hun Hman Dan Tur Ni 31 May, 2020 (Pathianni Zan)

Marka 3:28-30 - Thlarau Thianghlim Sawichhiat

Tv. Lalhruaitluanga

BD-IV, ATC

            Tihtakmeuhvin ka hrilh a che u, mihring fate hi an sualna zawng zawngah leh Pathian an sawichhiatna kawng engah pawh, an sawichhiatnaahte chuan ngaihdam an ni ang; tu pawh Thlarau Thianghlim meuh sawichhia erawh chuan eng tikah mah ngaihdamna a hmu lo vang a, chatuan sualna kawngah chuan thiam lohvin a awm zâwk ang,” a ti a.  (“Ramhuai bawlhhlawh a zâwl a ni,” an tih avâng khân chu chu a sawi a ni.) Marka 3:28-30

            Jerusalem atanga dan zirtu lo chhuk thlate khan Isua kha an sawi chhe nasa hle mai a. ‘Belzebula a zawl a ni. Ramhuai lal a ni’ tiin nasa takin an sawisel a. Thlarau Thianghlim puihna ni loin ramhuai puihnain a ni ramhuai a hnawhchhuah tiin nasa takin an sel a ni. Chu an sawiselna leh an thu sawi zawng zawng chu Isua chuan a hre vek a. Chung ho chhan let nan chuan he thu hi a sawi ta a ni.

            Jerusalema atanga dan ziakmi lo kalte kha Isua thiam loh chantir saa lo kal an ni a. Isua thil tih zawng zawngte kha ngun taka, thlithlaia, a zirtirnate kha uluk taka ngaithlak tuma lo kal an ni lova. Isua thiam loh chantir tum saa lo kal an ni.

            Dan ziak mite khan Isua an hmu a, a thil tihte pawh hmu reng chung si khan Isua kha an ring duh lova, Isua chu ramhuai lal ti hialin an chhuah a ni. Chu chu Isuan a duh loh em avangin, Thalrau Thianghlim meuh sawi chhia chu ngaihdamna a hmuh loh tur thu a sawi a ta a ni.

            Kan Kohhran Thurin VI-naah chuan Thlarau Thianghlimin kan chunga hna a thawh dan a sawi a. Thalrau Thianghlim chuan keimahniah felna rah chi tinrengin a thawk chhuak thin a, Isua Krista pawm thei turin min pui a ni. Kan nuna Thlarau Thianghlim hnathawh kan lo hnawlna chu Thlarau Thianghlim kan sawi chhiatna chu a ni a. Thlarau Thianghlim chuan kan sualte sim turin min pui a, chu kan sualte sim tura min puitu ber Thalrau Thianghlim kan hnar chuan, Pathian ngaihdamna kan chang dawn lo a ni.

            Chhandamna kan chan theih nan Pathianin a Fapa Isua Krista khawvelah a rawn tir a, Isua chuan Krawsah kan tan chhandamna a rawn thawk zo a, chu Chhandamna chang tur chuan Thlarau Thianghlim chuan min pui a, kan sual zia leh chak loh zia min hriattira, tichuan Thlarau Thianghlim chuan Chhandamna pawm thei turin chakna min pe zawk a ni.

            Pathian Chhandamna ropui tak kan chan theih nan, Pathian hnenah intulut ila, a duh zawng kan tih theih nan Pathian Thlarau chuan min tanpui dawn a ni. Chutiang kan ti lova, Thlarau Thianghlim kan hnawl anih erawh chuan chatuan thlengin ngaihdam kan ni thei dawn lo a ni.