Zanin KTP Hun Hman Dan Tur Ni 27 May, 2020 (Nilai Zan)

Matthaia 14:22, 23- Fianrial Tawngtai

Tv. Lalhruaitluanga

BD-IV, ATC

“Tin, mipuite chu a ṭîntîr vêl chhûngin, a kal hmaa râl lehlama lo kal hmasa tûrin zirtîrte chu lawngah a chuan luihtîr ta nghâl a. Tin, mipuite chu a ṭîntîr hnuin, ṭawngtai tûrin tlângah chuan a han kal hrang a; tin, tlai lam a lo nihin chutah chuan amah chauhvin a awm ta a.” Matthaia 14:22, 23

            Kan bible chang tarlan hi Lal Isuan mipui sangnga a hrai zawh hnu chiaha thil thleng a ni a. Johana ziak lama kan hmuhah chuan, Isuan thilmak a han ti kha, mipuite chuan ropui an ti em em a, lala siam an tum ta ut ut mai a. Mahse Isuan chu chu a lo hriatin, mipuite chu a kaldarh tir a, a zirtirte pawh ral leh lama kal tur chuan a kal tir ta zawk a ni. Isua chu tawngtai turin tlangah a kal hrang daih thung a, fianrial hmang turin mipui tam tak lak ata chu a kal hrang zawk a ni.

            Ringtute nunah hian fianriala Pathian pawlin thil tangkai tak leh kan tih ngei ngei tur pawh a ni. Lal Isua pawh kha fianrial tawngtai nei turin a kal fo tih kan hmuin kan hria a ni. Fianriala Pathian pawl thinte nunah Pathian a inpuang thin a ni.

            Ravi Zacharias-a chuan, “Tawngtaina chu Pathian kan biakna leh kan duh zawng kan thlenna ringawt hi a ni lova. Tawngtaina chu Pathian nena lairil taka kan inpawlna zawk hi a ni” a ti a ni.

            Mi tam tak chuan, kan tawngtai hian Pathian hnenah thil kan dil ang a, chu kan thil dil chu kan duh anga rawn tihlawhtling turah kan ngai thin. Chu chu tawngtaina awmzia leh nihphung a ni lo a ni. Tawngtaina chu Pathian nena thinlunga inzawmna leh inpawhna zawk hi a ni, Pathian nena kan inkawmna pawh tih ila a sual awm love.

            Chutiang ang taka, Pathian nena inpawlna tak tak nei thei tur chuan fianriala Pathian nen kan inpawl hi a ngai a ni. Chutianga kan inpawl theihna hun remchang chu tun hun a ni. Kan inkhawm thei lova, kan inkharkhipa, chu hun chu remchangah hmangin Pathian nena inpawlna tak tak nei turin, fianrial tawngtaina neiin Pathian nen in pawl thin ang u.