Sunday, October 17, 2010

Tv. R. Lalengmawia chuan chatuan ram min lo pansan ta.......
(1985 - 2010)
Vuina Programme
Vui hun : Dt. 8th October, 2010 (Zirtawpni) Dar 12:00 Noon
Vuitu : Pro. Pastor R.Lalthlengliana
Thusawi : Chhungkaw aiawh
Thusawi : Chawlhhmun Branch YMA
Zaipawl : Luangmual Pastor Bial Zaipawl
Thlanmual : Upa Lalropuia
R.Lalengmawia chanchin tlangpui : Tv. R. Lalengmawia hi Pu Chawngchhunga leh Pi Vanlalhmangaihi fapa neih chhun; unau panga zinga a naupang ber dawttu ni turin October ni 19, 1985 khan a lo piang a. A naupan lai pawha naupang duhawm leh hmai fel tak niin, nu leh pa, chhungte leh thenawm khawvengte tan pawh naupang ngainatawm tak a ni thin. A naupan lai hian hrisel lohna avanga buaipui ngaiin a awm meuh lova, Pathian malsawmna dawngin naupang thang duang tak a ni nghe nghe. A chhungte chuan ‘Mama’ tiin an ko mai thin a. Naupan tet atanga mize zawi leh nungchang tha, nu leh pa thuawih inchhung hnaah pawh rim taka nu leh pate tirhna apianga thuawih taka kal thin a ni a, a u leh naute pawh hian an sawisel khat khawp a ni.
A unaute : An upa ber Lalramengmawii hi naupangtein 1982 khan kum 4 mi niin a boral a. A upa ber dawttu Rebecca Lalramnghaki hian pasal nei tawhin an chhungkuain Luangmualah an khawsa a, Mama u chiah Priskil Vanlalhruaii hi AMRO-ah hnathawkin a awm a, an te ber R.Lalchhandami (Damteii) hian Jabalpur-ah, M.Tech (Agri) a zir mek a ni.
Zirna lam : Primary leh Middle School hi Chawlhhmun Comprehensive Schoolah a zir zova. Kum 2000 khan matric K.M.H.S.S atanga passed-in, kum 2002 khan Pawl 12 a zo leh a, Hrangbana College atangin B.A hi kum 2005 khan a zo leh a ni. Hemi hnu kum 2006 kum khan a u Priskil Vanlalhruaii (Mahruaii) Delhi-a hnathawka awm chu zuk finin Computer a zir a. Kum 2008-ah lo hawin Luangmual Pastor Bial School-ah hna a thawk ve tan a ni. Tin, nikum kum tawp atang khan Computer zir chhunzawm leh a duh avangin zirtirtu hna hi a bansan leh a. Mipa awm chhun anih avangin a nu leh pate pawhin anmahni enkawl tura an rin ber a ni a, zirna lamah pawh tang turin an fuih nasa thin hle. A ni erawh hi chuan lehkha zir chiam lam ai chuan kohhran leh khawtlang rawngbawlna peng hrang hranga inhman hi a duh zawk a, “Kan mamawh tawk chu Pathianin min pe dawn a lawm,” a ti sam et mai thin. A unau te nena zirna leh eizawnna an sawi nikhua pawh hian, “A ram leh a felna chu zawng hmasa zawk rawh u…” tih hi a sawi fo thin.
Kohhran leh khawtlang lama Rawngbawlna : Kohhran thiltihna leh thlarau lam rawngbawlna hi Senior Department zirlai anih atang tawhin a tui a. Gospel Meichher Team (Synod Revival Team)ah te telin kawtthlera tawngtai leh feh chhuah rawngbawlhnate an ti nasa thin a. Kohhran Programme-ah pawh hla te remin boruak hlimawm tak thlentu an ni fo thin a. A hun tawp thleng hian Evangelism leh Kohhran rawngbawlna hi a tuipui hle a ni. Tuna Kohhran lama rawngbawl hna a chelh mekte chu – Bial Zaipawl member, Kohhran Zaipawl Asst. Conductor, Chawlhhmun Branch K.T.P : Jeremia Group Secretary, Naupang Sunday School lamah Junior Deptt. Zirtirtu a ni a, Music Sub- Committeee Member-ah te a tel a ni. Khawtlang lamah, a bikin Y.M.A-ah pawh chhiatni thatniah a theih ang tawka inhmang thin a ni a. Tunah hian Chawlhhmun Branch Y.M.A Executive Committee Member niin, Property Sub-Committe Member a ni mek a. Tin, zirlai pawl bik tana din Youth for Chawlhhmunah hian Vice-President-in a awm mek a ni. Heng Kohhran leh khawtlang rawngbawlna peng hrang hranga a telnaah hian theih ang tawka inhmangin a kul a taiah a tang thin a. Hetianga a hun an tawp ta mai hi a rawngbawlpuite pawhin an uiin tuar thiam harsa pawh an ti hle a ni.
A hun tawp lam : Mama hian Sinus hi chu a nei a, zai pawh a tawk tawh a, awngrawp phahnan erawh a hmang lem lo va, hrisel lohna em em han sawi tur tehchiam hi a nei ngai lem lo bawk. October ni 6, 2010 tlai lam atang khan a taksa pum mai hi na a ti em em mai a, a luak zui bawk a, tha leh mai tura ngaih anih laiin, a awm dan chuan zual lam pan zelin zan dar 10 vel khan Civil Hospital Casualty pan pui a ni a. Doctor-ten damdawi te pein an chiu a, tha leh mai tura ngaiin an hawtir leh a. Amaherawhchu, a damdawi ei leh an chiuna te chuan awmze neiin a taksaah hna a thawk thei meuh lova. In thlen thlakpui anih hnuah pawh zual lam a pan leh zel avangin October ni 7, 2010 zing dar 1 khan Durtlang Hospital panpui a ni leh a. A dinhmun a that loh thu Doctor ten an lo sawi a, Oxygen te pein amah pawh a chau hle tawh a, amah pawhin rawn that leh mai a beisei thu te pawh a sawi a, chutih laiin a chau tial tial a, zing dar 8:15 vel khan theihtawpa rawng a lo bawlsak thin Lalpa hnena chawl turin min lo kalsan ta a ni.

No comments: